Modernización, dixitalización e proxección exterior, os retos da cultura galega en 2023

A Xunta de Galicia anunciou que porá en marcha novas iniciativas para fomentar a modernización, dixitalización e proxección exterior da cultura galega durante o próximo ano.

O director xeral de Cultura, Educación, FP e Universidades, Anxo M. Lorenzo, manifestou este domingo durante a 15ª edición da feira Culturgal, que todos os sectores verán reforzado o seu apoio con distintas iniciativas. A este respecto, destacou que o investimento cultural da Xunta en 2023 será de 104 millóns de euros.

Así mesmo, avanzou algúns puntos como a internacionalización e dixitalización do sector literario, o aumento do investimento das actividades dos museos, un novo programa de Xeración Cultura ou a Galicia Filme Commission.

Ademais, o director xeral de Cultura destacou a importancia que terán distintos acontecementos como o centenario de María Casares, ao que asistía este domingo, coa presentación do documental 'Tralos pasos de María Casares', de Sabela Hermida e Isabel Branco; ou o Ano Picasso, polo 50 aniversario da súa morte, que incluirá unha gran exposición no Museo de Belas Artes da Coruña.

Por outra banda, segundo comunicou a Consellería, a xornada de feira contou coa participación da directora-xerente da Cidade da Cultura, Ana Isabel Vázquez, durante a presentación da colección de lectura fácil da Editorial Galaxia, con adaptacións de obras de Xosé Neira Vilas, así como da web/ app Play Ari[t]mar de promoción da música e poesía galego-portuguesa.

A actriz coruñesa María Casares | Fonte: Xunta