Angrois.- Adif destina 60.000 euros a un técnico de peritaxe e que comparece en dous meses no xuízo

En xaneiro de 2018, o instrutor da causa polo accidente do tren Alvia deu por presentado por parte do administrador de infraestruturas ferroviarias (Adif) un informe do consultor Antonio Puyol, ao que a empresa pública adxudicara por 58.900 euros (71.269 euros con impostos) a elaboración desta peritaxe, sobre "análise de risco" en relación co sinistro ferroviario ocorrido en Angrois (Santiago) en xullo de 2013.

En setembro dese ano, este enxeñeiro, que dirixe a empresa especializada en instalacións ferroviarias Airtren, ratificou en sede xudicial a súa peritaxe. Entre outras teses, en consonancia co redactado no seu informe pericial, Puyol defendeu que a desconexión do sistema 'ERTMS' na curva da Grandeira, onde morreron 80 persoas e 145 resultaron feridas, "non afectaba á seguridade" do tramo.

Agora, con data do pasado 25 de novembro, a plataforma de contratación do sector público acaba de publicar outro anuncio de adxudicación por valor de 60.000 euros (72.600 euros con impostos) para Puyol, ao que tivo acceso Europa Press.

En concreto, adxudícanselle 'servizos para a análise técnica pericial e testifical relativo ao procedemento xudicial sobra a liña 082 entre Ourense e Santiago de Compostela'. Puyol está citado para declarar en calidade de perito o próximo 31 de xaneiro.

Licitado de novo por procedemento negociado sen publicidade, neste expediente consta que foi a oferta "economicamente máis vantaxosa" e dáselle un prazo de execución de 12 meses.

Segundo fontes de Adif consultadas por Europa Press, o contrato "ten por obxecto actualizar o informe elaborado polo Sr. Puyol, á luz de todo o que se veu incorporando á causa tras a súa elaboración".

O exdirector de Seguridade na circulación de Adif, Andrés Cortabitarte (c), á súa chegada para declarar no xuízo polo accidente do Alvia, na Cidade da Cultura de Santiago de Compostela, a 6 de outubro de 2022 | Fonte: Álvaro Ballesteros