O Sergas debe pagar 35.000 euros a un paciente por provocarlle a perda dun testículo

O Tribunal Superior de Xustiza de Galicia (TSXG) confirmou unha sentenza pola que o Servizo Galego de Saúde (Sergas) debe indemnizar con 35.000 euros a un paciente de 24 anos por un erro no diagnóstico da torsión do testículo dereito, o cal acabou perdendo.

Segundo un fallo datado a 28 de marzo, a sección terceira da Sala do Contencioso Administrativo desestimou o recurso interposto polo Sergas contra a sentenza emitida en xullo de 2024 polo Xulgado do Contencioso-Administrativo número 1 de Pontevedra, que estableceu a mencionada indemnización.

A sentenza de primeira instancia, que agora se ratifica, viu un "funcionamento anormal" do sistema público no punto de atención continuada (PAC) de Silleda, onde a facultativa que o atendeu non viu a torsión testicular que finalmente se diagnosticou ao paciente catro días despois, nas urxencias Hospital Clínico de Santiago. Entón, tívoselle que practicar unha orquiectomía que supuxo a perda do testículo dereito.

Os maxistrados do TSXG sinalan no fallo que son coñecedores "por outros casos similares" que os protocolos médicos a seguir "refiren que cando un paciente ten unha doenza a nivel testicular hai que actuar con rapidez", especialmente cos mozos. "Se transcorre un número de horas determinado desde o inicio da dor intensa testicular dificilmente se pode salvar o órgano mencionado, ao necrosarse e infartarse", engade o alto tribunal galego, que ademais menciona que a detección a tempo require realizar unha "ecografía 'doppler' escrotal".

Esta proba "declinouse facer porque a doutora que atendeu ao paciente na PAC de Silleda non observou signos ostensibles de que o paciente puidese estar a padecer o día que lle atendeu en consulta a torsión testicular". Por tanto, o TSXG conclúe na sentenza, aínda recurrible ante o Tribunal Supremo, que de pautar a realización da proba ecográfica, "habería maiores probabilidades de salvar o testículo, polo que remitir ao paciente de novo ao domicilio prescribíndolle uns antiinflamatorios foi inadecuado". Todo iso ocasionoulle "unha perda de oportunidade terapéutica".

Edificio do Sergas | Fonte: xunta.gal.