Formoso denuncia o "completo abandono" da Xunta aos concellos do rural
Critica o "buraco negro" da xestión autonómica e provincial coa estación de montaña de Manzaneda
Por Europa Press / Redacción | OURENSE | 07/12/2022 | Actualizada ás 17:11
O secretario xeral do PSdeG, Valentín González Formoso, denunciou este mércores o "completo abandono" aos concellos do rural por parte da Xunta, no marco dunha visita á comarca de Terra de Trives, onde puido coñecer a situación da estación de montaña de Cabeza de Manzaneda e mantivo unha reunión cos alcaldes a alcaldesas para escoitar as súas demandas.
No transcurso da súa visita á Pobra de Trives, o líder dos socialistas galegos repasou os problemas comúns que teñen os municipios das comarcas de Terra de Trives e Terra de Caldelas, que van "desde a exclusión financeira, con oficinas bancarias que abren só un día á semana, períodos amplos sen médico na atención primaria, ou insuficiencia na dotación de chan industrial".
O dirixente socialista incidiu en que esta zona ten "unha gran singularidade" ao contar coa estación de montaña de Cabeza de Manzaneda no seu territorio, o que "debería ser un motor económico da comarca".
Con todo, para Formoso está afectada pola "mala xestión autonómica e provincial que leva a que estea "totalmente desaproveitada para volver dotar de vida a uns concellos que sofren especialmente o despoboamento".
"BURACO NEGRO"
Formoso subliñou que arrastra "moitos anos de débedas permanentes das que se deben facer cargo as administracións públicas" e unha "mala xestión económica", da que responsabiliza á Xunta e á Deputación de Ourense, polo que considera un "buraco negro" na súa xestión.
O aspecto máis importante, reivindicou, é o de "dar garantías aos traballadores da estación, que actualmente están nun gran estado de incerteza". Formoso defendeu que "merecen unhas institucións que se preocupen polo seu futuro laboral", xa que "son moitas familias na comarca" as que dependen desta actividade.
O secretario xeral do PSdeG resaltou a "potencialidade turística" do lugar para Galicia, especialmente ao non ter ningún outro punto comparable no seu territorio. Dita singularidade esixe, baixo o seu punto de vista, unha aposta que "non se dá" por parte das administracións provincial e autonómica, que dirixe o PP.
