O maior análise de asociación de xenoma completo en cancro colorrectal fíxose en Santiago e identificou máis de 100 de factores xenéticos

Investigadores do Instituto de Investigación Sanitaria de Santiago de Compostela (IDIS), vinculado ao Servizo Galego de Saúde e á USC, identificaron máis dun centenar de factores xenéticos asociados ao desenvolvemento do cancro colorrectal.

O estudo, publicado na revista 'Nature Genetics' e no que tamén participaron grupos de traballo de Estados Unidos e do Reino Unido, establece por primeira vez a relación de moitos destes factores xenéticos con este tipo de cancro, o máis frecuente en España e que acumula neste 2022 uns 44.000 novos diagnósticos, segundo as previsións da Sociedade Española de Oncoloxía Médica.

A investigación liderada pola doutora en Bioloxía da USC Ceres Fernández-Rozadilla, do grupo de Medicina Xenómica do IDIS, logrou identificar máis de 100 loci xenómicos e 155 xenes vinculados co desenvolvemento do cancro colorrectal, que causa 18.000 mortes ao ano en España.

A través da análise multiómica en máis de 100.000 pacientes con este tumor e máis de 150.000 casos en persoas sas, todos eles de ascendencia europea e asiática, os investigadores detectaron 205 localizacións no xenoma humano con risco de desenvolver esta enfermidade.

Trátase do maior metaanálise de asociación do xenoma completo neste tipo de tumor desenvolvido ata a data que, ademais de identificar os xenomas potencialmente perigosos, tamén permitiu a análise complementaria de expresión xénica e metilación en máis de 1.000 mostras de mucosa colónica e 15.000 de múltiples tecidos para revelar outras 53 asociacións de risco adicionais.

Toda esta información xenómica permitiu delimitar 155 xenes con efectos altamente relacionados co risco de padecer cancro colorrectal, moitos dos cales non se vincularon ata agora co desenvolvemento destes tumores, segundo explica IDIS nun comunicado.

Grazas a esta información, poden avaliarse as funcións máis relevantes na determinación do risco de padecer este tumor, entre as que figuran as variacións na homeostase colorrectal normal, a proliferación, a adhesión celular, migración, inmunidade e as interaccións microbianas relacionadas coa aparición destes tumores.

"Os nosos achados ofrecen información sobre a oncoxénese colorrectal e destacan os potenciais obxectivos en tecidos para as novas estratexias de tratamento e quimioprevención en cancro colorrectal", explicou Fernández-Rozadilla.

Investigadores do Instituto de Investigación Sanitaria de Santiago de Compostela (IDIS), vinculado ao Servizo Galego de Saúde e á USC | Fonte: IDIS