Asinado o primeiro convenio colectivo de Geal co apoio de parte do comité e sen o respaldo da CIG

O primeiro convenio colectivo de Xallas Electricidad y Aliajes (Geal) foi asinado este mércores co apoio, segundo destaca a empresa, das seccións de CGT, UGT e USO, pero sen o respaldo da CIG.

O comité de Geal (antes Ferroatlántica) está formado por 13 integrantes: seis da CIG, catro de CGT --uno deles na actualidade en USO-- e tres que orixinalmente pertencían a UGT pero que agora son independentes --abandonaron a organización por discrepancias coa dirección no proceso de venda--.

Nun comunicado, a compañía apunta, en palabras da directora corporativa, María Couto, que se trata dun "fito moi importante" e que será "o primeiro de moitos outros". Pola súa banda, o representante da CIG Alfonso Mouzo, en declaracións a Europa Press, critica que o texto asinado é "tremendo" posto que, entre outras cuestións, "cárgase as contratacións de verán que había que facer para dar vacacións ao persoal e non respecta as cláusulas de revisión do IPC", ademais de eliminar, apunta, o médico de empresa.

É por iso que a central nacionalista, que si participou nas negociacións, non rubricou o convenio que as mesmas deron como resultado.

AS NEGOCIACIÓNS

Desde xaneiro deste ano, Geal viña aplicando o convenio colectivo provincial para a industria siderometalúrxica "xa que o proceso de negociación do que sería o XIII Convenio Colectivo de Geal terminou sen acordo", apunta a propia empresa.

"A aplicación do convenio provincial foi ratificada polo xulgado da Coruña e o Tribunal Superior de Xustiza de Galicia (TSXG). Con iso, confirmábase a perda de vixencia do convenio de empresa", lembra.

Fábrica de Ferroatlántica en Cee, actual GEAL | Fonte: remitida