Buscan a un home de 79 anos desaparecido na tarde do xoves en Sanxenxo

A Garda Civil coordina un operativo para atopar a Jesús María Padín, un home de 79 anos, veciño de Portonovo, no municipio pontevedrés de Sanxenxo, que desapareceu na tarde do xoves.

Segundo informan o 112 Galicia e o Concello de Sanxenxo, falta da súa casa desde as 16.00 horas, cando saíu a dar un paseo como fai habitualmente. Mide 1,70, leva plumífero azul mariño, pantalón marrón e lentes.

O amplo operativo de procura está despregado entre Sanxenxo, Portonovo e O Grove. O home ten por costume percorrer a costa ata San Vicente, entre as praias da Lanzada, Montalvo e lugares rochosos.

Participan no dispositivo, ademais de amigos e familiares, a Garda Civil, o Seprona, drons da Axencia Galega de Emerxencias (Axega), Policía Local, Protección Civil e os servizos municipais de Emerxencias.

O 112 recibiu a alerta a medianoite a través da Benemérita e, acto seguido, a central de emerxencias solicitou a intervención doutros corpos. Durante a noite, rastrexaron diversas zonas polas que adoita camiñar Jesús María Padín, pero aínda non deron resultados.

Ademais, o 112 puxo a situación en coñecemento de Gardacostas de Galicia, por se fose necesaria a mobilización do helicóptero 'Pesca 1', así como de Protección Civil de Meis, Ribadumia e Cambados.

Jesús María Padín, home de 79 anos veciño de Portonovo, en Sanxenxo, desaparecido o 5 de xaneiro de 2023 | Fonte: CONCELLO DE SANXENXO