Créase a categoría estatutaria de dietista-nutricionista do Sergas
O Diario Oficial de Galicia (DOG) publica este luns 9 de xaneiro o decreto, completando así un proceso de elaboración que se iniciou en febreiro deste ano coa exposición pública do proxecto.
Por Europa Press / Redacción | SANTIAGO DE COMPOSTELA | 09/01/2023 | Actualizada ás 15:40
O Diario Oficial de Galicia (DOG) publica este luns 9 de xaneiro o decreto polo que se crea a categoría estatutaria de dietista-nutricionista do Servizo Galego de Saúde (Sergas), completando así un proceso de elaboración que se iniciou en febreiro coa exposición pública do proxecto do decreto e que contou coa participación das organizacións sindicais na Mesa Sectorial.
O decreto foi aprobado polo Consello da Xunta o pasado mes de decembro e consta de seis artigos nos que se regulan o seu obxecto, o réxime xurídico da categoría, o acceso á mesma, as súas funcións e determinadas especificacións relativas ao persoal, as retribucións e a xornada.
Pola súa banda, na disposición adicional fíxanse o nivel dos postos de traballo da nova categoría e as súas retribucións complementarias iniciais. Pechan o texto unha disposición derogatoria e dúas finais, relativas á habilitación normativa e á entrada en vigor do decreto.
PROGRAMA PILOTO
De maneira paralela á creación desta nova categoría, e como expresión de actuar no ámbito da dieta e a nutrición, a Xunta informou en decembro o inicio dun programa piloto no Sergas cun total de 94 nutricionistas en atención primaria, para a mellora da capacidade diagnóstica neste nivel asistencial.
Os novos profesionais repártense nas sete áreas sanitarias: 18 na da Coruña e Cee; 7 na de Ferrol; 16 na de Santiago e O Barbanza; 15 na de Lugo, A Mariña e Monforte de Lemos; 13 na de Ourense, Verín e O Barco de Valdeorras; 15 na de Vigo; e 10 na de Pontevedra e O Salnés.
FUNCIÓNS DOS NUTRICIONISTAS
Corresponde ao persoal dietista-nutricionista do Sergas desenvolver, con carácter xeral, actividades orientadas á alimentación da persoa ou de grupos de persoas, adecuadas ás necesidades fisiolóxicas e, no seu caso, patolóxicas das mesmas, e de acordo cos principios de prevención e saúde pública.
O persoal dietista-nutricionista que se incorpore no ámbito da atención primaria apoiará a actividade das unidades e servizos desenvolvendo as funcións que lle sexan asignadas entre as seguintes: realizar valoracións do estado nutricional; dar soporte na prescrición de dietas e consellos alimentarios; identificar os factores de risco e as prácticas dietéticas inadecuadas, mediante cuestionarios de cribado e rexistros dietéticos; colaborar no soporte nutricional domiciliario nas funcións que lle son propias; elaborar dietas estandarizadas; participar en programas de información e educación alimentaria e nutricional, preventivos ou terapéuticos, e outras accións e intervencións no ámbito da saúde comunitaria; participar na formación continuada do demais persoal sanitario en materia de dietética e nutrición; participar na coordinación, en materia de dietética e nutrición, entre os niveis asistenciais; realizar unha actividade estatística en clave de igualdade e/ou violencia de xénero; e calquera outra función que se corresponda co conxunto de aptitudes e capacidades que derivan da titulación de diplomado/a ou graduado/a en Nutrición Humana e Dietética.
Pola súa banda, o persoal dietista-nutricionista que se incorpore no ámbito da atención hospitalaria, desenvolverá as funcións que, entre as seguintes, sexanlle asignadas: colaborar na adecuación dos sistemas de alimentación establecidos en cada centro e na elaboración do manual ou código de dietas hospitalarias; realizar o deseño, a confección e o seguimento das dietas especiais ou personalizadas por solicitude de persoal facultativo especialista en endocrinoloxía e nutrición; colaborar na prevención de desnutrición hospitalaria, mediante a valoración do estado nutricional, dentro do equipo multidisciplinar; participar na coordinación e a relación do servizo/unidade de endocrinoloxía e nutrición coa área de traballo de hostalaría e alimentación; realizar valoracións do estado nutricional; calcular necesidades nutricionais; informar o equipo responsable das deficiencias nutricionais actuais ou potenciais; elaborar protocolos de seguimento, control e avaliación nutricional; participar na elaboración dun plan de intervención individual segundo a patoloxía e a prescrición nutricional; participar na indicación do soporte nutricional; informar ao/á paciente e familiares das características da dieta/pauta nutricional prescrita; participar na coordinación, en materia de dietética e nutrición, entre os niveis asistenciais; e calquera outra función que se corresponda co conxunto de aptitudes e capacidades que derivan da titulación de diplomado/a ou graduado/a en Nutrición Humana e Dietética.
