O BNG pídelle aos deputados galegos facer "unha fronte común" para que se inclúa a Galicia no corredor do hidróxeno
Denuncia "unha nova discriminación" do Goberno central ao non recibir ningunha das axudas a catro proxectos de hidróxeno 'verde'
Por Europa Press / Redacción | SANTIAGO DE COMPOSTELA | 11/01/2023 | Actualizada ás 11:36
O deputado do BNG no Congreso, Néstor Rego, denuncia "unha nova discriminación" do Goberno central a Galicia ao non recibir ningunha das axudas a catro proxectos de hidróxeno 'verde' concedidas polo primeiro Consello de Ministros de 2023, por valor de 73 millóns de euros, en diferentes comunidades.
Nun comunicado, Rego urxe a rectificación do Executivo e que apoie a construción da infraestrutura que conecte a Galicia con Portugal e Europa para permitir o desenvolvemento de diversos proxectos de produción de hidróxeno 'verde'.
E é que o Bloque incide na necesidade de incluír á comunidade galega na rede de distribución de hidróxeno a través dos hidroductos que conecten con Portugal e Europa. Así, o deputado nacionalista chama ao resto de deputados galegos a facer "unha fronte común" para impedir unha nova discriminación do Goberno central cara a Galicia.
"Neste momento, e a falta do desenvolvemento de mellores alternativas, hai unha aposta no hidróxeno verde como opción para avanzar na descarbonización da economía e para alcanzar os obxectivos fixados de neutralidade climática. É, por tanto, unha oportunidade para a creación de emprego e o impulso ao tecido produtivo no noso país. Pero o Goberno do Estado decide deixar fóra das axudas os proxectos galegos", reproba Rego.
