Rueda ve a retirada do delito de sedición a Puigdemont como a "chapuza" dunha reforma legal "feita a medida"
O Tribunal Supremo só mantén o delito de malversación e inclúe o de desobediencia.
Por Europa Press / Redacción | SANTIAGO DE COMPOSTELA | 12/01/2023 | Actualizada ás 16:56
O presidente da Xunta, Alfonso Rueda, manifestou que a retirada do delito de sedición ao expresidente da Generalitat Carles Puigdemont evidencia "toda a chapuza" dunha reforma lexislativa "feita a medida" para "cumprir un fin concreto" e que agora os xuíces "teñen que aplicar".
Así o trasladou, a preguntas dos medios, despois de transcender que este xoves o maxistrado do Tribunal Supremo (TS) Pablo Llarena eliminou o delito de sedición do procesamento contra Puigdemont. Mantén o de malversación (que fixa penas de 4 a 12 anos de prisión e de 10 a 20 de inhabilitación) e inclúe o de desobediencia (que non contempla cárcere, pero si inhabilitación de 6 meses a 2 anos).
Á marxe, o maxistrado deixou sen efecto a euroorden ditada contra o líder independentista, aínda que decidiu manter a orde de busca e captura nacional.
Rueda esgrimiu que esta situación evidencia "a chapuza" dunha lexislación modificada para "cumprir un fin concreto" en relación a determinadas persoas, e que agora os xuíces vense obrigados a aplicar.
"Supoño que agora sairá alguén do Goberno central descualificando aos xuíces como sempre que toman resolucións que non lles gustan, aplicando as leis que eles mesmos fan", concluíu.
