O Foro Económico avisa dunha "acusada" desaceleración de Galicia en comparación co ritmo de crecemento en España
O economista Fernando González Laxe apunta que as previsións do IGE de crecemento estaban sobre o 3,5% en Galicia e do 5,5% en España para o peche de 2022.
Por Europa Press / Redacción | SANTIAGO DE COMPOSTELA | 24/01/2023 | Actualizada ás 13:59
O Foro Económico detecta unha "acusada" desaceleración da economía galega no terceiro trimestre de 2022, pois crece "moi por baixo" de España e Portugal, de forma que se está "desaxustando" do ritmo de avance estatal.
En rolda de prensa en Santiago para presentar o informe do terceiro trimestre, o economista Fernando González Laxe apunta que existe un diferencial de dous puntos porcentuais entre o PIB galego e español, algo que non ocorría "desde hai tempo".
Aínda que a mediados de 2022 diferentes organismos "proclamaban a apocalipse", valora que se conseguiu sortear a recesión, aínda que no caso galego obsérvase unha retardación respecto da puxanza española.
A este respecto, González Laxe apunta que as previsións do IGE de crecemento estaban sobre o 3,5% en Galicia e do 5,5% en España para o peche de 2022, con "un 'gap' de dous puntos porcentuais, moito". Aquí identifícase un peor comportamento da demanda interna no caso galego que no español.
Tamén González Laxe sinala que Galicia ten que "xogar con maior produción industrial en mercados distintos que os que sexan exclusivamente o francés e portugués", pois bota en falta sectores de "arrastre" para "crecer moito". Chama a apostar por alimentación especializada en 'bio' ou produtos medicalizados.
FALTA DE INVESTIMENTO PÚBLICO
Laxe critica que o investimento público reduciuse no terceiro trimestre en Galicia nun momento no que se debería impulsar a reactivación. Avisa de que "non podes cortar de forma radical e abrupta" ese apoio nestes momentos desaceleración e de maior brecha coa media española.
Precisamente, considera clave reforzar políticas industriais e fomentar a innovación para acurtar a distancia coa media española.
No tocante a fondos europeos, o expresidente da Xunta recoñece "certa falta de efectividade", cuestión que achaca a "un exceso de burocracia" que retarda o avance de proxectos e que se sigan "procesos antigos" para a contratación destes proxectos.
RETARDACIÓN
Pola súa banda, José Francisco Armesto debullou a situación económica galega no terceiro trimestre, cunha retardación "importante" ao subir o PIB un 2,5%, "a metade" do que crecía no primeiro e segundo trimestre. Ademais, hai un diferencial de dous puntos fronte ao 4,4% de España.
Nun contexto de incertezas, a inflación galega segue por encima da española --6,4% e 5,5% a peche de ano--, aínda que na parte final de 2022 hai unha baixada significativa respecto ao verán.
Contrasta que a demanda interna crece en España con que se detrae en 2,1 puntos en Galicia. Ademais, cae o consumo dos fogares galegos, mentres sobe no país. E a iso súmase que o gasto das administracións é "notablemente inferior" na comunidade.
Paralelamente, o mercado exterior séguese concentrando na automoción e o téxtil. Aínda que hai un repunte das exportacións enerxéticas, chámase a atención a que é debido ao aumento de prezos.
Outro problema crónico é que a produtividade galega segue por baixo da media española, co caso das manufacturas como exemplo de ser "significativamente inferior", cuestión achacada a un menor investimento en I+D.
"DESAXUSTE" DO MERCADO LABORAL
Patricio Sánchez foi o encargado de expor o "desaxuste" do mercado laboral galega fronte ao estatal, pois "se segue crecendo, pero con menor intensidade". O emprego creouse entre as mulleres, ao tempo cae no caso dos homes. O sector da construción está en auxe, con destrución no industrial e primario. Hai unha diminución de emprego público e un aumento entre os asalariados do sector privado.
Galicia computa "unha das peores situacións" entre autonomías en taxas de actividade e ocupación no terceiro trimestre. A taxa de desemprego do 10,8% é máis baixa que o 12,7% estatal, pero o dato galego é "superior no medio punto" en comparación co ano pasado. O retrato robot do parado na comunidade galega é o dunha muller de menos de 25 anos, estranxeira e con estudos primarios.
"TRAMPAS DO DESENVOLVEMENTO"
Neste informe do Foro dedícase un apartado ao que chama "trampas do desenvolvemento", no que se examina como numerosas rexións, entre as que se atopa Galicia, converxen rapidamente coa media europea, pero "chega un momento que esa converxencia se detén de maneira abrupta"
E é que nese proceso de converxencia prodúcese un estancamento a nivel de PIB per cápita, produtividade e emprego, o que Laxe identifica con "mellorar pero non chegar" ou "avanzar pero non correr". Por iso, apela a políticas pública "distintas", cun fomento da tecnoloxía e a eficiencia nas empresas. "Cústanos moito ser disruptivos", lamenta.
Xunto a isto, recóllese un estudo sobre dixitalización no que Galicia ocupa o último lugar entre comunidades en 10 das 16 variables avaliadas.
