Ledicia Costas: "Facía máis de 10 anos desde a última vez que publiquei de forma individual un libro de poesía"

A escritora viguesa Ledicia Costas recolleu este martes o seu galardón como gañadora do XX Premio de Poesía Afundación, nun acto que se celebrou na cidade olívica, na sede de Afundación, e no que participaron o director xerente da Obra Social de Abanca, Pedro Otero; a delegada da Xunta en Vigo, Marta Fernández-Tapias; e o presidente do Centro PEN de Galicia e presidente do xurado, Luís González Tosar.

Sobre a obra premiada, o poemario 'Ultraluz', o director de Afundación destacou que é como "un bosque habitado por criaturas procedentes da cultura popular", no que conviven "o máis fondo dos pozos e a máis brillante das saídas".

Ledicia Costas expresou o seu agradecemento por este galardón á Obra Social de Abanca, e tamén á Xunta (patrocinadora) e ao Centro PEN (colaborador), e apuntou que vive o recoñecemento como "un privilexio", ao tratarse do certame de poesía "máis importante de Galicia".

10 ANOS DESPOIS

"Facía máis de 10 anos desde a última vez que publiquei de forma individual un libro de poesía, 'Xardín de inverno', que xa non está dispoñible. E, tras todo ese tempo, decidinme finalmente a participar no Premio de Poesía Afundación con 'Ultraluz', un espazo de intimidade con vocación de ser compartido", aseverou a autora.

Ledicia Costas suma este recoñecemento a outros galardóns xa recibidos, como o Premio Merlín de literatura infantil, o Premio Lazarillo de creación literaria (en tres ocasións), o Premio Nacional de Literatura Infantil e Xuvenil, ou o Premio da Cultura de Galicia de Creación Literaria.

O Premio de Poesía AFundación está dotado con 6.000 euros, e implica a publicación da obra na colección 'Arte de trobar'. O certame púxose en marcha en 2002 e entre os seus gañadores hai autores como Xavier Seone, María do Cebreiro, Marilar Aleixandre, Yolanda Castaño, Miguel Anxo Fernán Vello, Oriana Méndez, Gonzalo Hermo ou Medos Romero.