O PP a BNG e PSdeG: "Vostedes non poden dicir que son feministas. A palabra queda grande"
O PP queda só na petición de dimisión da 'dúas' de Igualdade entre críticas á súa "campaña incendiaria".
Por Europa Press / Redacción | SANTIAGO DE COMPOSTELA | 07/02/2023 | Actualizada ás 20:54
O PP aprobará o mércores en solitario a iniciativa que reclama a destitución do número dous do Ministerio de Igualdade, Ángela Rodríguez, Pam; polas súas palabras nas que ironizou sobre as consecuencias da lei do 'só si é si', un asunto no que os grupos da oposición consideran que os populares manteñen unha actitude "incendiaria" que "pon en risco" os avances do feminismo.
"Vostedes non poden dicir que son feministas. A palabra queda grande", espetou a deputada popular Paula Prado a nacionalistas e socialistas durante a defensa da proposición non de lei, última da orde do día que foi debatida na sesión vespertina do pleno pero que será votada este mércores.
Tras unha intervención na que a popular acusou a nacionalistas e socialistas de ser "cómplices" dunha lei que puxo "en perigo" ás mulleres, Olalla Rodil (BNG) e Noa Díaz (PSdeG) afearon a súa actitude a Prado e o seu partido, aos que acusan de "esconder" que "están en contra" da lei por pór "o consentimento no centro" a través do que cualifican de "campaña incendiaria".
A viceportavoz dos populares galegos no Pazo do Hórreo tomou a palabra no estrado do hemiciclo, do que colgou un cartel no que podía lerse sobre un fondo vermello o texto 'Máis de 400 agresores sexuais', en alusión ao número de condenas rebaixadas en virtude da entrada en vigor da Lei de Garantías Sexuais.
Cando a deputada levaba un par de minutos de intervención, a Presidencia do Parlamento --nese momento exercida pola vicepresidenta primeira, Elena Candia-- solicitou a Prado que retirase o cartel en cumprimento do regulamento da Cámara. "Aquí puxéronse carteis e bandeiras e deixóuselles", replicou Prado, que accedeu a retirar a cartolina antes de pedir á Presidencia que se comprometa a que "a partir de hoxe non se poida pór nada" no estrado do hemiciclo.
"ACTITUDE INCENDIARIA"
Tanto Rodil como Díaz coincidiron en apuntar que o PP trata de "tapar" coa súa "campaña incendiaria" contra a lei do 'só si é si'. Tamén compartiron que as palabras de Ángela Rodríguez non foron as adecuadas, pero avanzaron que este mércores non apoiarán a iniciativa dos populares quen, no entanto, lograrán a súa aprobación grazas á súa maioría absoluta.
