O BNG afirma que o acordo co Goberno sobre as bonificacións na AP-53 "repara un agravio" cos concellos que atravesa
Estas bonificacións suporán que no traxecto Santiago-Lalín quen empregue esta autoestrada para ir traballar todos os días, teña unha rebaixa do 75 por cento, un aforro de 200 euros de facer esta viaxe 20 días ao mes.
Por Europa Press / Redacción | SANTIAGO DE COMPOSTELA | 20/12/2024 | Actualizada ás 18:43
A senadora do BNG Carme da Silva manifestou que o acordo da formación nacionalista co Goberno sobre as bonificacións de ata o 75 % na AP-53 "repara" unha situación de "inxustiza e agravio". "Estas bonificacións tamén suporán o alivio do tráfico e unha mellora na seguridade viaria da N-525 que atravesa varios núcleos de poboación", incide.
Xunto a representantes desta formación en Lalín e Agolada, insistiu en que foi o BNG quen "meteu no acordo de investidura a reivindicación de que a AP-53 tiña que ter bonificacións, sendo as mesmas que tiveron na AP-9". "Estas bonificacións suporán que no traxecto Santiago-Lalín quen empregue esta autoestrada, por exemplo para traballar todos os días, teña unha rebaixa do 75 por cento, un aforro de 200 euros de facer esta viaxe 20 días ao mes", sinalou.
