O PP pide endurecer as penas por ocupacións sen diferenciar mafias de persoas con necesidades
A oposición acusa aos populares de crear "alarma social" no canto de dar resposta a necesidades como vivenda pública..
Por Europa Press / Redacción | SANTIAGO DE COMPOSTELA | 17/02/2023 | Actualizada ás 14:26
O PPdeG quedou só para reclamar no Parlamento galego que o Goberno endureza penas por ocupacións. A proposta, que saíu adiante co rexeitamento da oposición, reclama recuperar o delito de usurpación de bens inmobles con entre tres e cinco anos de prisión, así como que haxa desaloxos en 24 horas.
Durante o debate, Begoña Freire (PP) afirmou que a ocupación ilegal "foi en aumento nos últimos anos", o que "xera un incremento de alarma social" ante o "crecemento sen freo" e pola existencia de "auténticas mafias da ocupación". Sostén que o Goberno central "non está a dar resposta" a esta problemática porque "non existe vontade política", polo que "se lava as mans e bota balóns fóra".
Aínda que apunta que é un "fenómeno difícil de cuantificar", a deputada popular afirma que as estatísticas mostran unha "clara tendencia ascendente", á vez que as medidas legais existentes "non son suficientes" para "combater esta forma de delincuencia"
REPROCHES POR CREAR "ALARMA SOCIAL"
Durante o debate, Paulo Ríos (BNG) acusou ao PPdeG de "utilizar o Parlamento galego para facer oposición ao Goberno central" e crear "alarma social". Así mesmo, referiuse a estudos que apuntan que un endurecemento das penas non leva a redución de delitos, polo que "non vai resolver ningún problema".
Ríos reprocha que o PP "non se interesou en ningún momento" por levar ao Parlamento iniciativas sobre os problemas de "primeira orde" de vivenda: 15.000 persoas en lista de espera en Galicia para acceder a unha vivenda de carácter social, subida do prezo do aluguer entre un 30% e un 40% nos últimos anos, máis de 300.000 vivendas baleiras e un incremento dun 17% dos desafiuzamentos por execución hipotecaria.
Nesta liña, Eduardo Ojea (PSdeG) expuxo que en Galicia as ocupacións cífranse nunhas 660, menos do 1% do total de España, a gran maioría propiedade de entidades financeiras e fondos voitre, "maioritariamente ocupadas por persoas en risco de exclusión social e clara vulnerabilidade".
Por iso, censura que o PP busca "intensificar a campaña para facer crer á opinión pública" que hai unha "alarma social". "Xerar medo para logo vender seguridade", lamenta. Igualmente, o deputado socialista lembra a reforma impulsada polo PSOE para cambiar a lei co fin de desaloxar a ocupas en 48 horas, aínda que remarca que as ocupacións só representan o 0,19% de todas as infraccións penais en 2022.
