A Xunta publica a relación de 1.008 profesores de FP que se integran no corpo de Educación Secundaria

A Consellería de Cultura, Educación, FP e Universidades publicou este martes na súa web a resolución provisional pola que un total de 1.008 docentes que ata o momento formaban parte do Corpo de Profesores Técnicos de Formación Profesional (CPTFP), declarado a extinguir pola Lomloe, intégrase no de Profesores de Educación Secundaria (PES).

Trátase dun proceso que, tal e como informa a Xunta, convocouse o pasado 9 de novembro para aqueles traballadores que contaban cun título universitario. Ademais, os solicitantes debían ser funcionario de carreira, titulares da especialidade na que se solicita a integración, ter destino definitivo ou estar á espera de destino en Galicia e estar en servizo activo, en especiais ou en excedencia --se o seu último destino en activo fose en Galicia--.

Segundo figura na listaxe, o acceso deste milleiro de docentes ao PES contémplase de maneira retroactiva, ben desde o 19 de xaneiro de 2021, data na que entrou en vigor a Lomloe, ou ben posteriormente, desde que cumprían os requisitos.

Tamén hai unha listaxe para aqueles traballadores que se xubilasen antes de que en novembro de 2022 saíse a convocatoria, que igualmente percibirán a diferenza salarial retroactivamente. A resolución é provisional, polo que aínda haberá un prazo de reclamación entre este xoves, 9 de marzo, e o mércores 22.

COMPLEMENTO COMPENSADOR

De forma paralela, hai 665 docentes de FP que, ao non dispor de titulación universitaria, non poden pasar do CPTFP, encadrado no subgrupo A2 de funcionarios, ao PES, no subgrupo A1. Para eles, o Goberno galego aprobou a semana pasada un complemento retributivo de case 147 euros mensuais co obxectivo de evitar a diferenza salarial que resultará desta división.

A CIG ADVIRTE "DISCRIMINACIÓN"

Este complemento salarial era unha reivindicación habitual dos sindicatos e o martes celebrouse a Mesa Sectorial de Educación, na que a Consellería presentou tanto esta medida como a relación provisional dos profesores que accedían ao PES
Tras esta reunión, a CIG-Ensino --sindicato maioritario-- fixo públicas as súas queixas porque a Xunta non permite o cobro retroactivo do complemento compensador aos 665 profesores, senón que o terán recoñecido desde o 1 de setembro de 2023, o que a central nacionalista ve unha "discriminación". Así mesmo, o sindicato critica que só se acepte o complemento compensador aos funcionarios de carreira, non aos interinos.

O conselleiro de Cultura, Educación, FP e Universidades, Román Rodríguez, reúnese con representantes dos profesores técnicos de FP | Fonte: XUNTA