A campaña do 25N da Xunta, candidato a peor anuncio de 2022

Catro campañas de publicidade machistas compiten por ter "a dubidosa honra" de ser elixidas como 'O Peor Anuncio de 2022' na décimo terceira edición destes premios que elixen socios e simpatizantes de FACUA-Consumidores en Acción a través da web FACUA.org/peorempresa.

Nesta ocasión, o premio dispútase entre dúas campañas que "sexualizan" ás mulleres, unha que as "culpabiliza da violencia de xénero" e unha última que "as ataca se os seus corpos non cumpren cos canons estéticos e non son normativos".

Trátase do anuncio de lavado de coches dun grupo de gasolineiras; da publicidade Operación Feira dun ximnasio sevillano; da "desafortunada campaña" contra a violencia machista da Xunta de Galicia; e da "caravana de mulleres" que promocionou unha discoteca asturiana.

Facua deu a coñecer aos nomeados este 8 de marzo, Día Internacional da Muller, para pór o acento "en como a publicidade continúa tratándoas como meros obxectos, reclamos para vender un produto e transmiten unha idea aínda estereotipada do que é ser muller, na que se lle atribúen valores que teñen pouco ou nada que ver coas súas capacidades e moito co seu aspecto físico".

A campaña está a difundirse a través das redes sociais coa etiqueta #ElAnuncioMásMachista. Os premios teñen outras dúas categorías: O Peor Abuso e A Peor Empresa, cuxos nomeados se darán a coñecer nos próximos días.

A asociación convoca estes premios desde 2010 para censurar os graves abusos que se producen no mercado e promover prácticas responsables das empresas cos consumidores e nas súas relacións con estes e as organizacións que representan os seus intereses.

Campaña Xunta 'Non debería pasar, pero pasa' | Fonte: Xunta