A CIG celebrará o 'Día da clase obreira galega' reivindicando que "non se toquen as pensións"
Segundo a CIG, de acordo con datos oficiais, "a pensión media en Galicia é de 930 euros mensuais, 150 euros por baixo do Salario Mínimo Interprofesional (SMI), cando no Estado español a media está en 1.089 euros".
Por Europa Press / Redacción | SANTIAGO DE COMPOSTELA | 09/03/2023 | Actualizada ás 14:36
A CIG celebra este venres, 10 de marzo, o 'Día da clase obreira galega' coa reivindicación de que "non se toquen as pensións", segundo informou o secretario xeral desta organización en Ferrol, Manel Grandal.
Fíxoo durante a presentación dos actos que teñen previsto organizar para lembrar a Amador Rey e Daniel Niebla, traballadores da antiga Bazán que en 1972 morrían tras recibir os impactos de bala durante unha mobilización dos operarios do estaleiro.
Este ano, a central nacionalista ten convocadas mobilizacións en toda Galicia e as protestas céntranse na demanda de que "as pensións non sufran un novo recorte". "Aprobar unha nova reforma das pensións, aumentando a 30 anos o período de cálculo, suporá un novo recorte das contías de entre un 6% e un 8%, como o propio Banco de España recoñece", advertiu Grandal.
Este aumento do calculo, segundo engade, "mantendo a reforma de 2011, apoiada por CC.OO. e UGT, fai crecer a caída progresiva da contía das pensións que vén padecendo nos últimos anos por causa da ampliación da idade de xubilación dos 65 aos 67 anos e do aumento do período de cálculo do 15 aos 25 anos".
DATOS
Segundo a CIG, unha vez pechado o ano 2022, de acordo con datos oficiais, "a pensión media en Galicia é de 930 euros mensuais, 150 euros por baixo do Salario Mínimo Interprofesional (SMI), cando no Estado español a media está en 1.089 euros". No caso das mulleres "chega a ser duns 350 euros inferiores", apunta.
Grandal detallou que este 10 de marzo comezará en Ferrol cunha asemblea de delegados, desde as 10,30 horas no seu local comarcal, para acto seguido acudir ao monumento ao 10 de marzo, no barrio de Recimil, onde desde as 12,30 horas realizarase unha ofrenda floral e a intervención dalgúns representantes desta organización.
A xornada finalizará cunha mobilización que partirá ás 19,30 horas desde o local comarcal da CIG, na avenida de Esteiro, e que percorrerá varias rúas de Ferrol, estando prevista a presenza do secretario xeral da CIG, Paulo Carril.
