Rueda avisa ao Goberno central sobre a eólica mariña: "Terán que escoitarnos porque tal cal o queren non vai ser"

Os proxectos eólicos mariños recollidos no Plan de Ordenación do Espazo Marítimo (POEM) semellan xa un novo campo de batalla entre a Xunta e o Goberno central. A pesar de que as dúas administracións cren necesaria a instalación desta enerxía nas costas galegas, difiren nas formas e nos xeitos de facelo, especialmente, porque este plan non tivo en conta as matizacións que fixo no seu día o Observatorio Galego da Eólica Mariña. Por iso, este xoves, o presidente da Xunta, Alfonso Rueda, avisaba á vicepresidenta Teresa Ribera; "así, tal cal o queren, non vai poder ser".

Na rolda de prensa posterior ao Consello da Xunta, Rueda destacou a necesidade de que o Goberno central teña en conta as alegacións realizadas polo Observatoiro Galego da Eólica Mariña e isto mesmo foi o que lle dixo á ministra Ribera que o chamou hai uns días e prometeu unha xuntanza. "Eu quero confiar na palabra da vicepresidenta Ribera... Espero que esa xuntanza se celebre o antes posible porque isto non pode ir ben se hai que facer o que eles din sen escoitarnos", dixo.

E é que Rueda insistiu en que a Xunta non se opón á instalación de grandes polígonos eólicos no mar, senón a que se faga con "criterios". "Nós non dicimos de renunciar á eólica mariña pero si compatibilizar isto cos recursos pesqueiros e o medio ambiente", indicou. Por iso, descartou adiantar medidas para tentar calmar ao sector pesqueiro como compensacións económicas, tal e como xa apuntou a conselleira de pesca. "Non sei se proceden ou non compesacións. Estamos nun momento inicial e o importante é achegar posturas e recibilas de primeira man, pero así, tal cal o queren, non vai poder ser", indicou. 

INICIATIVA EMPRESARIAL PRIORITARIA

Por outra banda, o Consello da Xunta aprobou conceder a catalogación de iniciativa empresarial prioritaria, unha figura creada polo Goberno galego para acelerar os trámites administrativos, aos parques eólicos que estean asociados a , sobre todo, aos que proxectos industriais que teñan algún acordo coas grandes empresa para que a metade da súa enerxía sexa suministrada por fontes eólicas con precios competetivos. Neste sentido, anunciou que se decidiu outorgar esta catalogación a 13 parques eólicos, 12 deles que suministrarán enerxía a Alcoa e o outro ao Grupo Cortizo.  

Precisamente, este mesmo xoves, Rueda mantén un encontro co novo máximo responsable de Alcoa en España. Unha xuntanza na que se analizará a actual situación da factoría de San Cibrao e na que o Goberno galego quere saber as previsións da multinacional estadonidense para manter a viabilidade da compañía e manter postos de traballo. "Ofreceremos o apoio da Xunta, máis alá dos acordos para ter un prezo xusto para as electrointensivas que xa non está na man da Xunta", dixo ao ser preguntado.