A clausura en París da mostra 'Foi un home' pecha o ano dedicado a Laxeiro

A Xunta puxo o colofón no Instituto Cervantes de París a un ano de reivindicación do legado de Laxeiro, un dos pintores galegos máis relevantes do século XX e figura destacada da vangarda pictórica coa clausura este luns da exposición itinerante 'Foi un home. Laxeiro en América (Buenos Aires, 1950-1970)', que sumou nesta estancia internacional máis de 1.000 visitas.

Nun comunicado, a Xunta destacou que esta iniciativa xurdiu despois de que a Real Academia Galega de Belas Artes decidise dedicarlle a Laxeiro no 2022 o Día das Artes.

Ademais, viuse reforzada coa implicación do Instituto Cervantes de París e da Embaixada de España en Francia, así como da Real Academia de Belas Artes de San Fernando en Madrid, unha das institucións culturais máis lonxevas de España, da que o propio pintor foi alumno.

UNHA MOSTRA ITINERANTE

A mostra inaugurouse simbólicamente na terra natal de Laxeiro, en Lalín, alcanzando entre abril e xuño de 2022 máis de 2.000 visitantes. Tras a estancia permaneceu entre xuño e xullo na Real Academia de Belas Artes de San Fernando de Madrid, onde recibiu 1.948 visitas. Ademais, entre setembro e decembro pasaron polo Museo Centro Gaiás da Cidade da Cultura para ver a retrospectiva 11.374 persoas.

A selección de pezas recolle a evolución de Laxeiro durante os 20 anos nos que se instalou en Buenos Aires, considerada a súa etapa de madurez, na que realizou algunhas das súas obras máis destacadas, achegándose ao expresionismo abstracto.

A exposición comisariada polo historiador de arte e ensaísta Carlos L. Bernárdez presentou un fiel reflexo da época na que o artista estivo condicionado polo contacto co mundo cosmopolita e co ambiente intelectual galego do exilio en América.