O mércores arrinca a segunda fase da Operación Semana Santa, con ata 9,4 millóns de desprazamentos
Por E.P. | Santiago de Compostela | 04/04/2023 | Actualizada ás 13:38
A Dirección Xeral de Tráfico (DGT) pon en marcha a partir deste mércores, ás 15.00 horas, a segunda fase da Operación Especial de Tráfico de Semana Santa na que se esperan 9,4 millóns de desprazamentos, un 2,47% máis que o ano pasado. Destes desprazamentos calcúlase que un 15% --1,4 millóns-- produciranse en Galicia e cornixa cantábrica
Esta é a fase máis importante desta operación especial que se puxo en marcha o venres 31 de marzo e que se dará por pechada ás 24 horas do luns 10 de abril, aínda que no caso do retorno a Galicia concluirá o 9, domingo, dado que non é festivo o luns.
A DGT estima que, en toda España, durante estes días producirase unha media de 1.566.667 desprazamentos diarios. Desde o arranque desta operación especial de Semana Santa o pasado venres, e ata a medianoite do luns 3 de abril, faleceron nas estradas 14 persoas, unha cifra ante a que a DXT insistiu en chamar á prudencia ao volante e lembrou a recomendación de cero alcol, conducir a unha velocidade adecuada, facer descansos cada dúas horas ou 200 quilómetros e porse o cinto.
As previsións de circulación elaboradas por Tráfico contemplan que desde primeiras horas da tarde do mércores (especialmente entre as 15 e as 23 horas), momento no que arrinca esta segunda fase en todas as autonomías excepto en Cataluña e a Comunidade Valenciana, poderanse producir problemas de circulación e retencións nas saídas e accesos dos grandes núcleos urbanos, tanto do interior peninsular como dos situados na periferia e costa, desprazándose a medida que avance a tarde ás zonas de destino.
DOMINGO 9 DE ABRIL, INICIO DO PRIMEIRO RETORNO
Na xornada do domingo comeza o primeiro retorno desta Operación Especial nas Comunidades de Andalucía, Aragón, Asturias, Canarias, Cantabria, Castela-A Mancha, Castela e León, Estremadura, Galicia, Madrid e Murcia, polo que durante todo o día instalaranse medidas de ordenación e regulación do tráfico para favorecer a entrada de vehículos aos grandes núcleos urbanos.
