Case 800 cirurxías suspendidas no Sergas desde o martes pola folga dos médicos

O Servizo Galego de Saúde (Sergas) estima que a participación na folga de médicos este venres para o global de Galicia baixou ata o 13,49%, cifra máis baixa para a quenda de mañá desde o seu arranque o martes. Ademais, ata a tarde do mércores, o paro obrigou a suspender un total de 791 cirurxías, 14.831 consultas externas e 1.298 probas.

Son datos ofrecidos este venres polo Sergas, que destaca que o 86,5% do persoal acudiu a traballar nesta cuarta xornada. O 13,49% de participación pola mañá supón un descenso con respecto ás cifras de días pasados. A Confederación Estatal de Sindicatos Médicos (CESM), que é a organización convocante, cifraba o seguimento en torno ao 60%.

Por áreas sanitarias, sempre segundo a Administración, de novo a que máis participa neste paro é a de Vigo, co 20,74% dos facultativos, seguida da de Ourense-Verín-O barco de Valdeorras, co 15,91%. Tras estas, están A Coruña-Cee co 12,75%, Lugo-A Mariña-Monforte co 11,94%, Santiago-Barbanza co 11,84%, Pontevedra-O Salnés co 8,15% e Ferrol co 8,1%.

O Sergas destaca o cumprimento "do 100%" dos servizos mínimos e que está a responder "adecuadamente a todas as urxencias", á vez que "respecta" a decisión de acudir á folga e fai unha chamada ao "diálogo".

ACTIVIDADE SUSPENDIDA

Así mesmo, a Administración sanitaria ofrece cifras da actividade que tivo que ser suspendida na tarde do xoves --terceira xornada de paro--. En total, aprazáronse nesta quenda 65 cirurxías, o 50,8% das que se realizan de media. En canto ás consultas externas aprazadas, foron 196, o 22,6% con respecto á habitual; e as probas anuladas pola tarde foron 15, o 2%.

Por tanto, ata o mércores o paro obrigou a suspender un total de 791 cirurxías, 14.831 consultas externas e 1.298 probas.

Sanitaria con cartel de servizos mínimos durante a terceira xornada da folga de médicos galegos | Fonte: Europa Press