Boborás, exemplo de #fermosismo pola Xunta

A conselleira de Medio Ambiente, Territorio e Vivenda, Ángeles Vázquez, visitou este luns o municipio ourensán de Boborás, e destacou que esta localidade e os seus veciños son un exemplo de aposta polo "fermosismo" e a redución do impacto paisaxístico.

A conselleira referiuse ao compromiso da Xunta para fomentar actuacións que contribúan a reducir o impacto nas contornas de determinadas edificacións, equipamentos públicos ou elementos etnográficos deteriorados.

Nunha visita, acompañada pola alcaldesa de Boborás, Patricia Torres, e polo delegado territorial da Xunta, Gabriel Alén, a titular de Medio Ambiente sinalou que este concello ourensán, xunto con Lobios, foi o ano pasado o municipio máis beneficiado pola orde de incentivos convocada polo Instituto de Estudos do Territorio (IET) para a corrección de impactos paisaxísticos en vivendas e propiedades privadas.

Durante a súa visita comprobou as actuacións nun dos inmobles beneficiarios das axudas, con traballos de limpeza nos exteriores e revestimento da vivenda; así mesmo, visitou o lavadoiro de Miandreiras, recuperado o ano pasado.

Visita da conselleira de Medio Ambiente, Territorio e Vivenda, Ángeles Vázquez, a Boborás | Fonte: Ramsés-EP