A Fundación Castelao múdase para a Cidade da Cultura
A entidade terá unha sede na Cidade da Cultura onde realizar actividades culturais.
Por Europa Press / Redacción | SANTIAGO DE COMPOSTELA | 18/04/2023 | Actualizada ás 13:10
A Xunta e a Fundación Castelao ratificaron este martes un acordo polo que se cede a esta institución un espazo na Cidade da Cultura para a instalación dunha sede e a realización de actividades culturais e de divulgación ao redor da figura do creador e escritor de Rianxo.
O convenio foi asinado este martes no Gaiás polo conselleiro de Cultura, Educación, FP e Universidades, Román Rodríguez, e o presidente da Fundación Castelao, Miguel Anxo Seixas Seoane.
O titular de Cultura destacou que a intención do Goberno galego é "avanzar nun maior coñecemento se cabe do legado dun dos principais referentes intelectuais, literarios e artísticos de Galicia, parte fundamental" da historia da Comunidade. Así mesmo, subliñou, "coidar e protexer a obra de Castelao para o presente e o futuro debe ser responsabilidade de todos os axentes culturais".
O presidente da Fundación Castelao, pola súa banda, destacou o compromiso desta institución de "achegar a figura de Castelao á cidadanía do mundo, en todos os soportes con todos os medios".
