Así son os proxectos de investigadores da USC para combater a Covid
Hai purificadores de aire mediante uso de radiación ultravioleta, test de antíxenos máis rápidos e eficientes que os actuais ou novos métodos que complementen a PCR.
Por Europa Press / Redacción | Compostela | 25/04/2023 | Actualizada ás 16:31
Investigadores da USC presentaron este martes os resultados de proxectos de investigación relacionados coa covid-19 concedidos nas convocatorias da Axencia Galega de Innovación (GAIN) Conecta Covid e Rescate ISCIII, financiadas a través do Fondo Europeo de Desenvolvemento Rexional (Feder), e que serviron para desenvolver novas estratexias terapéuticas de potencial aplicación á hora de paliar outras patoloxías.
Así se puxo de manifesto na xornada de presentación que acolleu o Centro de Investigación en Medicamento Molecular e Enfermidades Crónicas da USC (CiMUS). Alí, o vicerreitor de Política Científica da USC, Vicente Pérez Muñuzuri, mostrou a súa confianza en que nos próximos meses algúns dos resultados presentados sexan transferidos á industria. Pola súa banda, na súa intervención, a directora de GAIN, Patricia Argerey, destacou o papel "capital" que ciencia e innovación xogaron á hora de dar resposta á pandemia.
Entre os proxectos expostos, un test rápido de detección precoz de covid baseado en inmunocromatografía; ferramentas multivalentes para diagnóstico temperán e terapia antiviral Sars-Cov2; novos axentes antivirais baseados en aminoquinolinas para o tratamento da pandemia actual por Sars-Cov2; o deseño e síntese de proteínas recombinantes superficiais quiméricas do virus Sars-Cov2 para a produción dunha vacina en fermentos; ou un sistema de desinfección intelixente para o control da propagación aérea do Covid-19.
PURIFICACIÓN DO AIRE
En concreto, o grupo Photonics4life da USC desenvolveu unha ferramenta para a desinfección intelixente do aire que circula polos condutos de ventilación mediante o uso de radiación ultravioleta C (UV-C), combinando tecnoloxías fotónicas, IoT e Intelixencia Artificial.
Con este sistema, segundo explicou Xusto Arines Piferrer, un dos seus responsables, a través de "algoritmia intelixente" que ten en conta distintas variables detectadas no aire detéctase "cal é o risco de contraer o Covid". A continuación, iso xera unha alerta e iníciase a "emisión de radiación ultravioleta para purificar o aire dentro da cabina de purificación".
OUTROS PROXECTOS
Baixo a coordinación do investigador do CiMUS, José A. Costoya, o proxecto 'Covtes: proba rápida para a detección precoz de SARS-CoV-2 baseada en inmunocromatografía' centrouse no desenvolvemento dunha proba para detectar antíxenos virales nunha mostra nasal, nasofarínxea ou de saliva a través da súa detección específica mediante un ensaio de inmunocromatografía baseado en nanoanticorpos.
Así mesmo, este proxecto logrou desenvolver un prototipo de test de antíxenos cun dispositivo de lectura para poder interpretar os resultados a través dunha aplicación para teléfonos móbiles.
Pola súa banda, o proxecto do investigador do Ciqus Eduardo Fernández trata o desenvolvemento de métodos áxiles que complementen á proba PCR, xa que esta é "lenta, custosa e require de grandes equipos e un laboratorio de microbioloxía". Ademais, a idea liderada pola investigadora do CIQUS, Concepción González Belo, estudou a nivel molecular como se produciría a "desactivación" da resposta inmune utilizando ferramentas computacionaiss e biotecnolóxicas.
No caso do proxecto Nanodecov, da investigadora do Cimus María José Alonso, abórdase o desenvolvemento de nanoterapias para a prevención e tratamento da Covid-19, mentres que o profesor Wajih Ao-Soufi lidera o proxecto 'Detección rápida e automatizable para SARS-Cov-2 baseada en PCR, nanotecnoloxía e microfluídica', que naceu para alcanzar un sistema de detección do virus baseado en técnicas moleculares e integrando a nanotecnoloxía e microfluídica coa automatización e potencial conectividade para a súa comunicación.
