Abre o prazo para inscribirse no programa da Xunta de intercambio xuvenil a Xapón
Por Europa Press / Redacción | SANTIAGO DE COMPOSTELA | 23/05/2023 | Actualizada ás 17:53
A Xunta abriu o prazo para inscribirse no intercambio xuvenil a Xapón do programa 'A Xuventude non mundo', que volve celebrarse do 1 ao 6 de setembro, despois do parón provocado polo Covid-19. Segundo destacou a Consellería de Política Social e Xuventude, o obxectivo é facilitar o coñecemento doutras realidades socioculturais e lingüísticas, así como favorecer e potenciar a adquisición de habilidades e competencias non formais.
Ademais, nesta ocasión, a maiores de participar as persoas que xa tiñan praza adxudicada en 2020, e que acaban de confirmar a súa participación de novo, ábrense 12 prazas máis para completar o grupo do intercambio. Os participantes da iniciativa, mozos residentes en Galicia con idades comprendidas entre os 18 e os 30 anos, viaxarán á Prefectura de Wakayama, no país xaponés.
O intercambio cobre o aloxamento en réxime de pensión completa en cuarto de uso múltiple, o transporte no ámbito do intercambio e as actividades organizadas pola entidade de acollida. Os interesados teñen aberto o prazo desde este martes ata o 29 de maio. Para inscribirse deben facelo no formulario electrónico habilitado na web de Xuventude. A admisión será por rigorosa orde de inscrición, ata cubrir a totalidade de prazas convocadas para o intercambio.
