Sabes canto gastan os concellos pequenos para manter os servizos públicos?

Os pequenos concellos prestan menos servizos que os grandes, pero gastan case o mesmo por habitante, esta é unha das conclusións do último estudo de Red Localis. Os expertos insisten na promoción de fusións de municipios, mancomunidades, consorcios, áreas metropolitanas ou colaboración máis activa coas deputacións provinciais para paliar esta problemática.

Os concellos de ata 5.000 habitantes destinan 426 euros per cápita a servizos públicos básicos (seguridade e mobilidade cidadá, vivenda, urbanismo, benestar comunitario e medio ambiente), unha cifra moi similar aos 455 euros dos municipios entre 50.000 e 100.000 habitantes, que prestan moitos máis.

Polo seu menor desenvolvemento económico, os municipios con menor poboación destinan 142 euros a actuacións de carácter económico, case o 12% do seu orzamento fronte a pouco máis do 8% de media. Para os gastos de funcionamento do concello, os de menos de 5.000 habitantes destinan 247 euros per cápita, fronte aos 166 euros de media.

Así, os concellos con menos poboación deben realizar un esforzo maior que aqueles con máis habitantes. Teñen que dedicar unha parte maior dos seus orzamentos ao pago dos intereses da débeda pública.

Estas cifras despréndense da nota 24 do Observatorio Municipal Galego, elaborada por Alberto Vaquero García, Codirector da Red Localis, unha das actividades da Cátedra do Bo Goberno Local da Universidade de Vigo.

Casas na aldea de San Paio do Carballal, en Montederramo | Fonte: Idealista.com