Dispositivos especiais de seguridade en toda Galicia para a noite de San Xoán
Na Coruña, Cruz Vermella axudará de maneira especial con preto de 50 voluntarios e equipos especializados para asegurar a noite máis corta do ano.
Por E.P. | Santiago de Compostela | 22/06/2023 | Actualizada ás 12:29
A Xefatura Superior de Policía Nacional despregou un dispositivo especial para reforzar a seguridade durante as celebracións, deste fin de semana, pola festividade do San Xoán en Galicia tanto nos areais como nos barrios onde haxa celebracións.
Nun comunicado os axentes indicaron unha serie de recomendacións para todos aqueles cidadáns que vaian participar nesta festividade. Así, explicaron que as aglomeracións de persoas son aproveitadas polos ladróns xa que, tras a subtracción dos efectos, poden ocultarse mellor entre a multitude e evitar ser localizados.
Ante isto, indicaron que se deben evitar as mochilas ás costas e os bolsos de man deberán ir cruzados na parte dianteira, ademais de non perder de vista as pertenzas de cada un. Se nun momento dado, varios individuos que buscan vender algo ou se achega un grupo con calquera pretexto, pode ser que o que busquen é distraer a atención mentres outros se fan coas pertenzas.
Tamén as aglomeracións unidas ao consumo de alcol, poden provocar rozamentos que leven a enfrontamentos violentos ou actos de vandalismo. No referente á retirada de diñeiro dos caixeiros, o corpo de seguridade incidiu en que hai que cerciorarse previamente de que non haxa outra persoa detrás ou demasiado preto. Xa que, podería coller lle diñeiro do caixeiro antes.
Os días posteriores ao festexo, os axentes explicaron que reciben moitas denuncias por extravíos de documentación, polo que pediron que se tente levar as pertenzas en petos pechados.
A CORUÑA
Por outra banda, a cidade da Coruña contará durante a noite da festividade coa colaboración de preto de cincuenta persoas voluntarias para ocuparse do dispositivo de seguridade cidadá organizado en coordinación con outras entidades e dirixido polo propio Concello. Así, explicaron que o seu papel será reforzar a asistencia sanitaria e o transporte sanitario urxente da poboación en xeral e de quen o necesiten nas zonas dos areais de Riazor e Orzán en particular.
Para iso, a Cruz Vermella porá a disposición da cidadanía un hospital de campaña, postos de atención en praia, ambulancias, postos de atención de primeiros auxilios, vehículos de primeira asistencia e de apoio loxístico e mesmo vehículos todoterreo destinados a emerxencia.
