Puy Fraga e Diego Calvo non descartan un adianto electoral en Galicia se se repiten as eleccións xerais
Coinciden en que Rueda fixará as galegas de acordo "co interese xeral.
Por Europa Press / Redacción | SANTIAGO DE COMPOSTELA | 31/07/2023 | Actualizada ás 15:48
O ata agora portavoz parlamentario do PPdeG, Pedro Puy, e o vicepresidente primeiro da Xunta, Diego Calvo, coincidiron en que o seu xefe de filas e presidente galego, Alfonso Rueda, porá data ás eleccións autonómicas de acordo "co interese xeral" da poboación galega.
"As eleccións serán cando o diga o presidente e, como o coñezo, sei que as convocará cando sexan máis convenientes para o interese xeral", dixo Puy, na que será a súa última rolda de prensa como portavoz na Cámara galega.
Aínda que Rueda xa arrefriou a posibilidade dun adianto das galegas, que tocarían o ano que vén, Puy foi preguntado pola posibilidade de que Rueda opte por fixar as galegas cunhas xerais no hipotético caso de que un bloqueo estatal obrigue a unha repetición dos comicios.
Neste punto, Puy declarouse "optimista" e asegurou que el aínda non perde a esperanza de que o "gañador" o 23J, Alberto Núñez Feijóo, poida formar goberno. Se isto non ocorre quedarían dous escenarios: un goberno dirixido por Pedro Sánchez ou que volva haber eleccións. Por iso, apelou a esperar "a ver que pasa". "Non me atrevería a dicir nada", reflexionou, antes de reafirmarse en que, en todo caso, o presidente galego "actuará tendo en conta o mellor para o interese xeral".
"IMOS A ESTAR PENSANDO EN GALICIA"
"Xa veremos se hai bloqueo ou non", coincidiu, pola súa banda, Diego Calvo, tamén en declaracións aos medios nun acto en Santiago. Nelas, insistiu en que, en todo caso, a decisión de Pedro Sánchez de "ir de vacacións" non anuncia "nada positivo".
En todo caso, no que respecta ao panorama electoral autonómico, subliñou que "hai unha diferenza fundamental entre o que pasou en España e o que pode pasar en Galicia". "En España, Pedro Sánchez fixou as eleccións ao día seguinte de ter un resultado nas municipais moi malo, de perder o poder en moitas comunidades autónomas e en moitas capitais de provincia", esgrimiu.
"Pensou só nos seus intereses partidistas e persoais", agregou, antes de contrapor que, en Galicia, Rueda, "que é a quen corresponde convocar as eleccións", xa avanzou que non tomará a decisión "pensando nos resultados electorais". "Imos estar pensando en Galicia", apostilou.
