A Deputación de Pontevedra estuda o proxecto de rehabilitación do Museo e Santa Clara
A Xunta de Goberno da Deputación de Pontevedra acaba de adxudicar 105 das preto de 300 prazas gratuítas do programa 'En Ruta coa Depo'.
Por E.P. | SANTIAGO DE COMPOSTELA | 18/08/2023 | Actualizada ás 15:50
O vicepresidente da Deputación de Pontevedra, Rafa Domínguez, indicou que nestes momentos o goberno provincial está a estudar os dous grandes proxectos de futuro vinculados ao Museo, como son a rehabilitación dos edificios históricos na praza da Leña e do convento de Santa Clara.
"Son dous temas moi complexos", sinalou o vicepresidente nunha comparecencia celebrada este venres para dar conta dos asuntos abordados na Xunta de Goberno Provincial.
Atendendo ás preguntas dos xornalistas, Domínguez lembrou que para a rehabilitación dos dous históricos inmobles, o Castro Monteagudo e García Flórez, no anterior mandato aprobouse un deseño que recibiu unha achega de tres millóns de euros de fondos europeos que deben certificarse antes de 2027.
É, engadiu, "un orzamento moi importante" que ten "prazos moi limitados" polo que xa se está "traballando no tema técnico", indicou o vicepresidente.
En canto ao convento de Santa Clara, a Deputación seleccionou durante o anterior goberno coaligado PSOE-BNG ao equipo de arquitectos Nieto Sobejano, que gañou o concurso de ideas para converter o cenobio nunha nova sede do Museo.
"Santa Clara non ten orzamento", lembrou Rafa Domínguez. Durante estes días o vicepresidente revelou que están "a ter distintas reunións, unha delas será o vindeiro venres" e están "a estudar toda a documentación" para decidir "cales serán os seguintes pasos".
Antes de tomar unha, decisión Rafa Domínguez espera ter "todo ben asentado", para o que se dá unha marxe de "tres ou catro semanas" e será entón, cando estea "todo ben definido", cando informe nunha rolda de prensa dos plans da Deputación para o convento de Santa Clara.
XUNTA DE GOBERNO
A Xunta de Goberno da Deputación de Pontevedra acaba de adxudicar 105 das preto de 300 prazas gratuítas do programa 'En Ruta coa Depo', que a institución provincial ofrece ás entidades pontevedresas para pasar un día de convivencia en lugares emblemáticos da provincia a través de 33 rutas temáticas.
Este ano serán case 20.300 persoas de 374 asociacións as que percorrerán a provincia con este programa, que conta cun orzamento de preto de 480.000 euros.
Ademais, o goberno provincial acordou ampliar os prazos de execución das obras de renovación de instalacións de iluminación exterior sustentable nos concellos de Arbo, Pazos, O Porriño, Tomiño, Tui, Meaño, Meis e Vilanova, nas que se inviste máis dun millón de euros e que contan cun importante financiamento de fondos europeos.
Para iso, a institución provincial obtivo máis de 866.000 euros do programa FEDER a través do IDAE (Instituto para a Diversificación e Aforro da Enerxía), o que supón o 80% do orzamento.
