O Concello de Ferrol gaña máis de 200.000 metros cadrados de Portos do Estado de maneira gratuíta
O proceso administrativo comezou no ano 2018.
Por Europa Press / Redacción | FERROL | 31/03/2025 | Actualizada ás 19:00
O presidente de Portos do Estado, Álvaro Rodríguez Dapena, catalogou como un "fito histórico" a cesión gratuíta de máis 200.000 metros cadrados da Autoridade Portuaria de Ferrol-San Cibrao ao Concello de Ferrol, tras un longo proceso administrativo iniciado no ano 2018. O integrante do Goberno do Estado tamén destacou "a colaboración interadministrativa" entre o Concello de Ferrol, a Xunta de Galicia e o Goberno central, "esencial para superar os trámites" e lograr desta maneira "a desafectación do dominio público que permitirá destinar estes terreos a usos urbanos, deportivos e sociais, mellorando a calidade de vida dos cidadáns".
Ditas manifestacións realizounas á primeira hora da tarde deste luns no acto de firma ante notario da cesión entre o presidente da Autoridade Portuaria de Ferrol-San Cibrao, Francisco Barea, e o alcalde, José Manuel Rey Varela. Na casa consistorial estivo, entre outros, o delegado do Goberno en Galicia, Pedro Blanco. Rodríguez Dapena detallou que esta iniciativa "reflicte o novo marco estratéxico portuario, que equilibra dimensión económica, ambiental e social", ao mesmo tempo que destacou "as iniciativas que temos en marcha, como a rexeneración da fronte marítima e a aposta por enerxías limpas", en alusión á eólica mariña e combustibles sustentables. Por último, asegurou que esta cesión é "un fito que consolida o porto como espazo para as persoas".
ESFORZO DE TODOS
O delegado do Goberno en Galicia, Pedro Blanco, incidiu en que "Ferrol vive hoxe un fito coa culminación deste proxecto, un esforzo colectivo que simboliza o froito de seis anos de traballo coordinado entre administracións". "A colaboración, sen cores políticas, entre o Goberno de España, o Concello de Ferrol, a Xunta de Galicia e outras entidades", están a lograr "revitalizar a cidade", insistiu Branco.
Tamén detallou que o Goberno central, a través dos ministerios de Transportes, Industria e Defensa, así como Portos do Estado, "impulsaron iniciativas de "carga de traballo para Ferrol e poder así recuperar o seu dinamismo", e que "tanto da actual corporación municipal como a anterior tiveron e teñen "lealdade institucional como clave para o progreso". "Ferrol está a recuperar o esplendor que nunca debeu de perder", afirmou o delegado.
UNS TERREOS "CLAVES" PARA A 'CIDADE DO DEPORTE'
Pola súa banda, o alcalde trasladou que, para o Consistorio, estes terreos son "clave para desenvolver a 'Cidade do Deporte' e outros proxectos urbanísticos". De feito, permitirá ao Concello licitar obras valoradas en 18 millóns de euros e avanzar no seu proxecto de 'Abrir Ferrol ao Mar'. José Manuel Rey Varela subliñou a cooperación entre administracións "como motor do progreso da cidade" e lembrou que, desde que en 2018 se empezou este camiño, gobernaron tres corporacións distintas.
Por último, o presidente da Autoridade Portuaria de Ferrol-San Cibrao, Francisco Barea, cualificou esta cesión como "un dos momentos máis gratificantes" e que este paso reflicte o compromiso das institucións públicas co progreso de Ferrol e o benestar dos seus habitantes. Ao mesmo tempo, agradeceu "a colaboración crave" do Ministerio de Transportes, Portos do Estado e o Concello, destacando o "diálogo e entendemento" entre administracións para materializar un proxecto que beneficiará a toda a cidadanía. "Hoxe gañan os ferroláns".
