Un só bombeiro tivo que apagar un incendio no Carballiño

Bombeiros comarcais denunciaron que un só profesional tivese que atender un incendio no Carballiño rexistrado o sábado nunha vivenda e criticaron a "actitude" dos consorcios provinciais, participados pola Xunta e as deputacións.

Nun comunicado, o comité de folga asegura que este suceso, con danos materiais, pero non persoais, "debe ser un claro exemplo do mal que se están facendo as cousas por parte das administracións".

"Os políticos que nos gobernan non deixan de lembrarnos que, como cidadáns, temos unha serie de deberes, pero o que parecen esquecer é o feito de que os nosos dereitos son os seus deberes", expoñen.

Ao fío diso, estes profesionais, en folga polo convenio, recalcan que todo cidadán "ten dereito a que se lle brinde un servizo de extinción de incendios e salvamento de calidade" e critican que un só bombeiro tivese que enfrontarse no Carballiño "a unha situación de máxima tensión".

"Nunhas condicións inaceptables e insultantes para a nosa profesión ante a pasividade de Xunta e deputacións", remarcan no seu comunicado no que ven "intolerable que se sosteñan servizos de extinción de incendios cun único efectivo, violando impunemente calquera criterio de seguridade, sobreexponiendo a vida do bombeiro e forzando situacións de tensións e descontrol imposibles de asumir na soidade".

Protesta de bombeiros comarcais en Santiago | Fonte: Europa Press