O imperio de Feijóo: dúas casas en Galicia e unha en Madrid, 4.000 accións de Inditex e máis de 600.000 euros en aforros, sen débedas
Cobrou do PP 39.000 euros en gastos de representación e 31.500 euros como presidente do Grupo Parlamentario Popular no Senado.
Por Europa Press / Redacción | Santiago de Compostela | 01/09/2023 | Actualizada ás 15:37
O presidente do PP, Alberto Núñez Feijóo, comprou unha casa situada na Coruña o pasado 11 de agosto, ten 4.000 accións de Inditex valoradas en 130.000 euros, así como 600.000 euros en aforros repartidos nun fondo de investimento e nun plan de pensións.
Así figura na declaración de bens presentada tras o seu cesamento como senador na Cámara Alta, na que tamén aparece que percibiu do Partido Popular durante 2022 máis de 70.000 euros. Concretamente, cobrou 39.000 euros en gastos de representación e 31.500 euros como presidente do Grupo Parlamentario Popular no Senado.
O dirixente popular tamén recibiu 1.770 euros como membro do Parlamento de Galicia o pasado ano e outros 22.000 euros como presidente da Xunta de Galicia. Ten en pleno dominio unha vivenda en Madrid, outra en Vigo e unha terceira na Coruña, que adquiriu o pasado 11 de agosto, así como unha leira rústica en Ames que data de 1992.
Destaca que Feijóo conta con 4.000 accións de Inditex, as cales tiñan un valor de 133.200 euros o pasado 14 de agosto. Na primeira declaración que o presidente do PP presentou no Senado, datada en xuño de 2022, contaba con 2.500 accións da compañía, 1.500 menos que agora. Por outra banda, non conta con débedas nin obrigacións patrimoniais de ningún tipo, tal e como figura na súa declaración de bens presentada na Cámara Alta.
Ata o momento, non todos os exsenadores e novos senadores presentaron as súas declaracións de bens, dado que teñen ata o 17 de setembro para facelo, segundo fontes da Cámara Alta.
