Increméntanse as axudas para comprar libros e material escolar: entre 160 e 270 euros, e entre 60 e 75, respectivamente
Alfonso Rueda considera que o sistema de libros de texto gratuíto "nin é xusto nin funcionou"; "o noso sistema é mellor".
Por Europa Press / Redacción | SANTIAGO DE COMPOSTELA | 01/09/2023 | Actualizada ás 15:53
A Xunta de Galicia incrementa este curso en máis dun 12 % a contía das axudas para comprar libros de texto e amplía nun 40 % os beneficiarios do vale para material escolar ata chegar aos 130.000 alumnos. Así o defendeu este venres o presidente da Xunta de Galicia, que visitou a libraría Gallaecia Liber de Santiago de Compostela acompañado do conselleiro de Cultura, Educación, FP e Universidades, Román Rodríguez.
O titular do Goberno galego asegurou que a Xunta aposta por un sistema educativo "inclusivo e de calidade no que se garanta a igualdade de oportunidades". "O deber das administracións, e a Xunta leva anos facéndoo, é axudar ás familias a que os gastos do inicio do curso sexan algo menores", indicou Rueda.
Así, o Goberno galego aposta por unha repartición "xusta" na que as axudas "se distribúan en función da renda familiar". "É un sistema de axudas que funciona tal e como recoñecen os propios libreiros, as familias e os colexios e é un sistema equitativo. Hai que axudar a quen máis o necesita", insistiu.
O presidente remarcou que as medidas permitirán aforrar "máis de 100 millóns de euros" aos fogares galegos con mozos en idade escolar. Entre as iniciativas en marcha destacan a bonificación dos comedores escolares, a conxelación das taxas universitarias ou as axudas para libros de texto e material escolar.
Segundo detallou Rueda, a Administración autonómica destina este ano 26 millóns de euros a axudas para libros e material e para o fondo solidario de manuais que hai nos centros educativos. Por unha banda, a Xunta amplía en case un 40 % os beneficiarios do vale para material escolar ata chegar aos 130.000 alumnos este curso. Todas as familias con renda per cápita igual ou inferior a 10.000 euros poderán recibir este bono que oscila entre os 60 e 75 euros, algo ao que ata agora só accedían os fogares con renda inferior a 6.000 euros.
Aumentan tamén as axudas para adquirir libros de texto. O orzamento total pasa de 5,9 millóns de euros a 6,7. En xeral, as familias recibirán entre 160 e 270 euros (en función da renda), fronte aos 140 e 240 euros do pasado curso. No caso dos alumnos de Educación Especial ou cunha discapacidade superior ao 65 %, esta achega será de ata 300 euros.
E manterase o banco gratuíto de libros de texto que teñen os colexios galegos e que permite que alumnos de entre 3º de Educación primaria e 4º de ESO reciban os manuais que necesitan sen que as familias teñan que asumir ningún custo.
O SISTEMA DE LIBROS DE TEXTO GRATUÍTOS "NIN É XUSTO NIN FUNCIONOU"
Preguntado por un posible incremento das axudas para a compra de libros de texto nos orzamentos de 2024, Rueda indicou que traballan sobre a nova dotación orzamentaria da comunidade, pero non confirmou nada respecto diso.
"A ver se temos certezas das cifras que se nos teñen que achegar desde o Goberno central para facer os nosos cálculos. Imos priorizar. Queremos que funcione o máis importante, o máis importante son os servizos públicos e axudar ás persoas que máis o necesitan. Por tanto, se é necesario facer ese esforzo, haberá que facelo. Pero eu prefiro por agora elaborar os orzamentos para saber o que temos e o que podemos ofrecer. Pero desde logo a xente xa ten demostración de que sabemos priorizar", detallou.
Respecto da petición de Anpas Galegas de retomar o préstamo de libros gratuíto, o presidente da Xunta considera que é un sistema que "nin é xusto nin funcionou".
"O noso sistema creo que funciona mellor. Hai un recoñecemento xeral, xa se que hai opinións en contra, pero é moito máis equitativo e garante non deixar desatendido a quen máis o necesita. Hai familias que se poden permitir un maior esforzo que outras e iso permite que aquelas que non teñen practicamente capacidade teñan garantido algo tan fundamental como que os seus fillos poidan ter o mesmo material escolar e libros con independencia do diñeiro que teña a súa familia", explicou.
