As feiras do libro pechan este ano cun 5% máis de vendas e máis de 18.000 participantes
Contou coa participación de 102 librarías, 16 editoriais e 13 institucións.
Por Europa Press / Redacción | SANTIAGO DE COMPOSTELA | 03/09/2023 | Actualizada ás 12:05
O circuíto de feiras do libro impulsado pola Xunta de Galicia e a Federación de Librarías para apoiar a actividade do sector pechou a edición deste ano cun incremento dun 5% nas vendas e máis de 18.000 participantes nas case 1.000 actividades organizadas.
O director xeral de Cultura, Anxo M. Lorenzo, celebrou estas cifras, nas que "o incremento na venda de publicacións e o aumento da participación nas actividades dá plenamente resposta aos obxectivos do Plan de impuslo ao libro galego para crear e fidelizar lectores a través de iniciativas como esta", sinalou nun comunicado.
Para Lorenzo, estas iniciativas son "un dos eventos culturais máis importantes cada ano, polo volume de participantes2 e alude ao seu papel "para reforzar o sector do libro como industria cultural relevante".
En cifras, o circuíto percorreu desde o pasado mes de abril 14 localidades galegas e contou coa participación de 102 librarías, 16 editoriais e 13 institucións. Neste sentido, celebráronse un total de 641 firmas de libros, 81 máis que na edición anterior. Nelas participaron 7.850 persoas, 1.749 máis que o ano pasado.
Tamén se organizaron case 300 actividades paralelas, entre talleres e iniciativas para o público máis novo, cunha participación de 8.615 persoas. Ademais, segundo os datos que manexa a Federación de Libreiros de Galicia, o 90% das librarías participantes apuntan a unhas vendas un 5% por encima dos datos do ano pasado. O circuíto de feiras conta co apoio económico de 150.000 euros por parte da Xunta de Galicia.
