Un hospitalizado tras o choque dunha embarcación cunha batea na Arousa
Aconteceu na Illa de Pedregoso.
Por Europa Press / Redacción | SANTIAGO DE COMPOSTELA | 04/09/2023 | Actualizada ás 10:09
Un dos ocupantes da embarcación que chocou cunha batea en Arousa tivo que ser evacuado a un centro hospitalario tras recibir un golpe nas costelas que lle dificultaba a respiración. Así o informa, no seu parte de incidencias, o 112 Galicia que precisa que foron os propios afectados os que contactaron co servizo de emerxencias pasadas as sete da tarde de onte.
Na súa comunicación indicaron que a bordo da embarcación navegaban dúas persoas, e unha delas recibira un golpe nas costelas que lle dificultaba a respiración. De feito, tras recibir os primeiros coidados polos profesionais de Urxencias Sanitarias de Galicia-061 no porto de Ribeira, só esta persoa tivo que ser evacuada ao centro hospitalario de referencia.
Segundo explicaron os afectados, a embarcación na que navegaban chocou contra unha batea preto da Illa de Pedregoso, en Arousa. A consecuencia do impacto, unha das persoas que ía a bordo resultou ferida, pero, ademais, necesitaban un rescate para saír da auga.
Desde o 112 Galicia, solicitouse a colaboración de Salvamento Marítimo, que enviou á zona a Salvamar Sargadelos. A bordo desta embarcación, os feridos foron trasladados ao porto de Ribeira, onde esperaba unha ambulancia de Urxencias Sanitarias de Galicia-061 para ofrecer os primeiros coidados.
