A arousá Ruth Vidal gaña o certame de Artes Plásticas da Deputación de Ourense, cunha obra para reflexionar sobre a paisaxe

A arousá Ruth Vidal Suárez gañou a XVII edición do certame de artes plásticas da Deputación de Ourense para novos creadores coa súa obra 'Lugar de lugares'. Así, este é un traballo con espazos tridimensionais nos que reflexionar sobre a paisaxe, tanto natural como artificial e a súa autora recibirá un premio de 5.000 euros. Nesta edición presentáronse 276 obras procedentes de 12 países distintos.

Segundo informou a institución provincial, o carácter internacional do certame permitiu a presentación de traballos procedentes de Arxentina, Cuba, China, Colombia, Chipre, Francia, Italia, Kazajstan e Suíza, entre outros, ademais de gran parte de España. O segundo premio, dotado con 3.000 euros, recibiuno o madrileño Jorge Fernández Valdés, pola súa obra 'Ensamble pictórico 8 sobre prisma de mármol negro', que combina pintura e escultura.

En canto ao terceiro premio, con 2.000 euros, recaeu na artista de Bueu Nerea Cordeiro Cerviño, pola peza 'Ciudades Telaraña' no que combina o debuxo coa instalación adaptada ao espazo expositivo. Así mesmo, os artistas Verónica Vicente co vídeo '(Des) Vestirse' e Andrés Rivas Rodís coa pintura 'El discurso del rostro' foron galardoados con dous accésits dotados con 1.000 euros cada un deles. Con todo, ademais dos premiados o xurado fixo unha selección dun total de 30 obras entre as 276 presentadas para conformar a exposición que estará desde este venres no Centro Cultural Marcos Valcárcel.

Ruth Vidal e a súa obra | Fonte: Cedida