O Centro de coidados de Santiago, pendente da proposta de resolución de asesoría xurídica para ter licenza
O PP de Santiago pediu este venres explicacións ao goberno que lidera o BNG polo "atraso" na concesión de licenza para implantar unha unidade de coidados intermedios, vinculado á remodelación do edificio do Centro Galego de Desenvolvemento Integral (Cegadi).
Por Europa Press / Redacción | SANTIAGO DE COMPOSTELA | 22/09/2023 | Actualizada ás 19:23
O PP de Santiago pediu este venres explicacións ao goberno que lidera o BNG polo "atraso" na concesión de licenza para implantar unha unidade de coidados intermedios, vinculado á remodelación do edificio do Centro Galego de Desenvolvemento Integral (Cegadi).
Ante esta petición de explicacións, o goberno local remitiu o cronograma da solicitude de licenza, que se iniciou no mandato pasado (11 de agosto de 2022) e que agora, segundo este esquema do executivo local, está pendente de que o técnico da asesoría xurídica envíe proposta de resolución da concesión de licenza. O encargo fíxose o 31 de agosto, despois de que o 14 de xullo a arquitecta municipal dese o visto e prace á concesión da licenza.
O proceso iniciouse en agosto do 2022, cando a Xunta enviou, segundo explica o Concello, uns links de caducidade de 96 horas coa solicitude. O 28 de setembro de 2022, baixo o mandato do socialista Xosé Sánchez Bugallo, faise un requirimento para que volvan habilitar esas ligazóns, que non se remiten por parte da Xunta ata o 13 de febreiro. Así, o 3 de marzo procédese a unha solicitude de documentación complementaria e, tras varios trámites, o 22 de xuño deste ano entrégase por completo. O 14 de xullo emítese o informe por parte da arquitecta e o 31 encárgase a proposta de resolución á asesoría xurídica.
CRÍTICAS DO PP
O PP de Santiago esixiu explicacións e cuestionou que "moito contratar a un exército de asesores para axudalos a gobernar, posto que parece que o número de concelleiros non é suficiente para xestionar o concello, pero á hora da verdade os asuntos non están a saír adiante".
Así, a concelleira Yolanda Otero Balsa sinala que "á hora da verdade, os asuntos non están a saír adiante e sería triste que se perdese a oportunidade de ter un centro referente a nivel nacional en coidados intermedios pola incapacidade do goberno" local. A edil popular tamén lamentou que, desde xuño de 2023, cando accedeu ao Concello o goberno do BNG, "a comunicación da administración local convertésese en nula co perigo que iso supón polo axustado dos prazos para sacar adiante este proxecto".
