Charlas sobre a toponomía galega en doce municipios promoverán a riqueza da nosa terra á hora de nomear lugares
Comezarán este mércores en Friol nunha nova edición do programa 'Toponimízate', coordinado pola RAG e a Xunta.
Por Europa Press / Redacción | SANTIAGO DE COMPOSTELA | 09/10/2023 | Actualizada ás 14:11
A iniciativa de divulgación da toponimia galega 'Toponimízate. Falámosche dos nomes da túa terra' no ano 2023 vai dirixida a 12 concellos das catro provincias con charlas nas que o público coñecerá a orixe e o significado dos topónimos que designan os seus lugares. O concello de Friol abrirá a tempada o vindeiro mércores, día 11, no seu centro sociocultural.
Coordinada pola Real Academia Galega (RAG), en colaboración coa Secretaría Xeral de Política Lingüística, esta campaña alcanza a súa sexta edición co obxectivo de "divulgar a riqueza toponímica de Galicia" e "involucrar á poboación" neste proxecto colectivo que salvagarda os nomes de lugares a través da aplicación 'Galicia Nomeada'.
Así o explicaron, na presentación desta campaña, o presidente da RAG, Víctor F. Freixanes; o secretario xeral de Política Lingüística, Valentín García; e o coordinador técnico do Seminario de Onomástica da RAG e de 'Galicia Nomeada', Vicente Feijóo, que impartirá as charlas. Como en edicións anteriores, este especialista contará coa colaboración do académico Gonzalo Navaza na elaboración das etimoloxías.
Na súa intervención, Freixanes destacou que Galicia é "un dos países máis habitados e nomeados de Europa" e a relevancia da "recuperación da microtoponimia". "O que máis nos interesa é implicar á xente na recuperación dese patrimonio, na riqueza e na autoestima", sinalou, tras engadir que na comunidade galega a poboación "acaba interiorizando emocionalmente os nomes dos lugares".
Valentín García, pola súa banda, sinalou que este proxecto "orixinal e de vangarda" conta "con 3.200 persoas colaborando e máis de 67.000 microtopónimos recolleitos" e que está "a traspasar fronteiras". "Diversas comunidades autónomas contactaron connosco para poder replicar 'Galicia Nomeada'", asegurou.
CONCELLOS
Este ano impartiranse as charlas ata comezos de decembro nos concellos de Padrón, Dumbría e Narón, na provincia da Coruña; Friol, Becerreá e A Pobra do Brollón, na de Lugo; Maceda, Amoeiro e Trasmiras na de Ourense; e Vila de Cruces, Tui, Ponte Caldelas, en Pontevedra.
Os municipios que participan nesta edición son lugares onde non se completou o traballo de 'Proxecto de Toponimia de Galicia', o que significa, segundo os seus responsables, que "aínda non se recolleu unha parte importante da microtoponimia do seu territorio". Respecto das charlas, Vicente Feijoo explicou que transmiten aos asistentes a riqueza toponímica de Galicia e "a urxencia que ten salvagardala ante a alarmante perda deste patrimonio cultural".
