Sumar inicia o seu "proceso de escoita" pero aínda non fixa prazos para elixir os seus candidatos á Xunta

A portavoz de Sumar no Congreso, Marta Lois, aínda non fixa un prazo para a formación do grupo galego ante un posible adianto electoral e incide nas escoitas e o debate previo á elección de candidatos. Así o fixo este sábado, en Santiago, antes de comezar as mesas de debate cidadá para comezar co proceso de escoita de Sumar Galicia.

A preguntas dos medios sobre se xa hai un prazo para formalizar a candidatura galega ás próximas eleccións autonómicas, Lois volveu a incidir en que primeiro debe haber un programa, un diálogo, e despois "a definición das candidaturas". "Estamos convencidos de que Sumar Galicia vai ser panca de cambio, é a condición de posibilidade para que haxa un cambio de goberno", puntualizou.

Ante a posibilidade dun adianto autonómico e a creación do grupo a portavoz de Sumar no Congreso remarcou que "aínda non están convocadas as eleccións" e que o importante é facer primeiro un programa e logo os candidatos. Con todo, Lois remarcou que "están convencidas" de que é unha forza política que "vai ensanchar o espazo progresista" e de que é "o principio do fin de toda unha etapa de deixamento e de parálise política en Galicia".

A continuación, fixo referencia ao presidente da Xunta, Alfonso Rueda, durante o debate do Estatuto de Autonomía ao que veu que "non ten proxecto" e que recorre a "antigas e vellas receitas neoliberais" de baixar impostos e "outro tipo de ocorrencias políticas" que, para Lois, enmárcanse en recursos de precampaña electoral. "Non hai un proxecto político, non hai un goberno con rumbo, por iso creo que é o momento e hai oportunidades para ensanchar o espazo progresista", sinalou.

A vicepresidenta segunda en funcións e líder de Sumar, Yolanda Díaz (e), e a portavoz parlamentaria de Sumar, Marta Lois (d) | Fonte: Alejandro Martínez Vélez - Arquivo