Galicia, ano tras anos menos nacementos
Os nacementos baixan un 3% nos oito primeiros meses do ano.
Por Europa Press / Redacción | SANTIAGO DE COMPOSTELA | 18/10/2023 | Actualizada ás 11:45
Galicia rexistra un total de 9.270 nacementos nos oito primeiros meses de 2023, o que supón 263 menos (-2,76%) que no mesmo período de 2022, segundo os datos que publica o Instituto Nacional de Estatística (INE) este mércores.
No tocante ao mes de agosto, houbo 1.185 novos nados en Galicia o que se traduce nun 12,7% menos que no mesmo mes do ano anterior. Do total de 9.270 nais nos oito primeiros meses, o grupo maioritario é o de 35 a 39 anos (3.037 nacementos), seguido de 30 a 34 anos (2.902). As nais de 40 anos ou máis foron 1.375 --incluídas 13 con 50 anos ou máis--.
España rexistrou 211.077 nacementos nos oito primeiros meses de 2023, 6.862 menos que no mesmo período de 2022 e a cifra máis baixa dos oito primeiros meses de ano no últimos sete anos, segundo as estimacións de nacementos mensuais do Instituto Nacional de Estatística (INE).
Durante os oito primeiros meses de 2023 estímase que naceron en España 211.077 nenos; fronte aos 217.939 en 2022; 219.635 en 2021; 229.904 en 2020; 236.965 en 2019; 245.696 en 2018; e 257.779 en 2017. Continúa así a tendencia á baixa desde que se contabilizan estes datos mensuais.
Doutra banda, nas 39 primeiras semanas de 2023, é dicir, ata o 1 de outubro faleceron en España un total de 324.446 persoas, o que representa 25.747 menos que no mesmo período de 2022 e a cifra máis baixa nesas semanas desde 2019, segundo a estimación de defuncións semanais do INE.
