A Xunta activa o plan contra posibles desbordamentos en ríos do sur das provincias de Pontevedra e Ourense
Hai acumulacións de máis de 80 litros por metro cadrado en 12 horas. Alerta laranxa para a tarde deste xoves na Coruña e Pontevedra.
Por Europa Press / Redacción | SANTIAGO DE COMPOSTELA | 26/10/2023 | Actualizada ás 11:14
A Xunta activou o 'Plan Inungal' contra posibles desbordamentos de varios ríos ao sur das provincias de Pontevedra (Tea, Louro e Tamuxe) e Ourense (Arnoia, Caldo e Támega). Así o decidiu a Administración autonómica despois de que varias estacións das Confederacións Hidrográficas Miño-Sil e Douro rexistrasen niveis do caudal que superaban os niveis normais, segundo figura na web de Meteogalicia.
Estradas con balsas de auga e rúas alagadas son as primeiras incidencias que deixan estas crecidas dos ríos en municipios do sur Pontevedra, principal zona afectada polas fortes choivas da madrugada e a mañá deste xoves en Galicia.
Segundo informan a Europa Press fontes do 112 Galicia, a de Pontevedra é a provincia máis afectada polas abundantes precipitacións, o que obrigou á activación dunha alerta laranxa por acumulacións de máis de 80 litros por metro cadrado en 12 horas. No resto de Galicia, fóra da Mariña, o aviso será de nivel amarelo pola caída de 40 litros por metro cadrado.
As primeiras incidencias ocorreron en concellos próximos á fronteira con Portugal. O 112 recibiu varios avisos de particulares por crecidas dalgúns ríos. En Mondariz e Ponteareas, a subida do caudal do Tea provocou inundacións nas rúas. Aínda que polo momento non foron de moita intensidade, a auga si entrou polos baixos dalgunhas vivendas.
A Policía Local de Ponteareas lanzou un aviso a través de redes sociais para informar do corte da estrada que vai a Freixa, polo acceso da N-120 ata o cemiterio de Ribadetea; así como da estrada da Ribeira, en Moreira. No caso do Rosal, un particular avisou da subida do río Tamuxe. A todo iso súmanse incidencias máis habituais, como caídas de árbores nas vías de circulación.
ALERTA LARANXA
Pola súa banda, a Dirección Xeral de Emerxencias e Interior da Xunta elevou ao nivel laranxa a alerta por temporal costeiro, a partir das 18,00 horas da tarde, para as provincias da Coruña e Pontevedra.
Segundo a Axencia Estatal de Meteoroloxía (Aemet), prevense ventos do oeste ou suroeste de forza 7, que poderán chegar a ser de forza 8 entre Cabo Ortegal e Estaca de Bares. Ademais, espérase mar combinado do oeste ou noroeste, con ondas de ata sete metros.
