Pontón sobre o que o acordo de investidura supón para Ferrol: "Aposta por un tren de proximidade coa Coruña"
Asegura que Rueda está molesto porque o BNG foi "capaz de conseguir o que el non é capaz".
Por Europa Press / Redacción | FERROL | 17/11/2023 | Actualizada ás 17:30
A portavoz nacional do BNG, Ana Pontón, estivo este venres en Ferrol para defender as melloras que o acordo de investidura proporcionará a esta comarca, á que "pon no mapa" con medidas como a mellora na mobilidade e descontos na AP-9. Nun acto no que estivo acompañada do deputado no Congreso Néstor Rego e do portavoz do BNG no Concello de Ferrol, Iván Rivas, Pontón asegurou que o presidente da Xunta, Alfonso Rueda, está a dedicarse a criticar o acordo de investidura desta formación co PSOE porque "lle molesta" que o BNG sexa "capaz de conseguir o que el non é capaz".
"Temos un acordo de investidura que garante a igualdade de trato a Galicia respecto doutras comunidades autónomas en materia dun asunto tan importante como é a redución da débeda", dixo Pontón, que cualificou de "triste" o "ver a un presidente da Xunta criticando un acordo que traballa para solucionar un problema que creou o Partido Popular".
A portavoz nacional do BNG dixo que Galicia ten neste momento máis de 14.000 millóns de euros de débeda pública, e que "a inmensa maioría desta débeda creouna o Partido Popular e, moi concretamente, nestes últimos 14 anos onde se triplicou a débeda pública, a pesar de que se fixeron recortes nos servizos públicos".
MELLORAS PARA FERROL
No caso do acordo de investidura co PSOE, Pontón detallou que este documento "pon a Ferrol no mapa" con medidas como a rebaixa na AP-9 e melloras no tren. Pontón detallou que este acordo "aposta por un tren de proximidade entre A Coruña e Ferrol" e pon encima da mesa "a modernización do FEVE e que teña unhas condicións que sexan análogas ás que pode ter Asturias".
Pola súa banda, Néstor Rego detallou que este pacto de investidura recolle a realización durante o ano 2024 dun "estudo informativo de modernización do ferrocarril entre Ferrol e A Coruña", cunha "acción similar", no bypass de Betanzos, co "compromiso explícito de que ese vai estar en funcionamento antes do final da lexislatura". Segundo o deputado na Cámara baixa, isto suporía "conectar por primeira vez, directamente, a Ferrol coa liña do Eixo Atlántico".
