O servizo de Renfe en Pontevedra precisa de máis prazas e persoal

O comité de empresa de Renfe na provincia de Pontevedra aprobou por unanimidade (están presentes os sindicatos UGT, CGT, Semaf, CCOO e SF) unha declaración na que urxe a prestación dun mellor servizo, e iso pasa por máis prazas e vehículos para os usuarios dos trens en Galicia, así como por un aumento do persoal.

En concreto, neste escrito asinado polo comité en Pontevedra, Sergio Pérez, pide máis servizos e asentos ofertados para os corredores Vigo-A Coruña e Ourense-A Coruña. Para iso, reclama máis vehículos asignados á Comunidade galega. Ademais, a misiva dirixida ao Ministerio de Transportes e a Renfe apunta a unha reestruturación dos servizos para ampliar os tempos de parada nas estacións dada a circulación de trens en dobre composición e o aumento de usuarios.

Este escrito chega despois dunha nova xornada na que varias incidencias técnicas na liña que une Vigo e A Coruña provocasen de novo atrasos á primeira hora da mañá. Tamén incide o comité na necesidade de incrementar os traballadores asignados á base de mantemento de Redondela, así como a dotar ao persoal dunha maior formación técnica para axilizar a subministración de repostos e a reparación de compoñentes.

Así mesmo, os representantes sindicais demandan un incremento dos traballadores nas áreas de Condución, Intervención e Canle de venda e información; ademais de tres postos de venda máis na estación de Pontevedra, un deles para persoas con diversidade funcional.

Trens de proximidade parados nas vías da estación de trens | Fonte: César Arxina - Arquivo