O teu soldo supera os 2.000 euros ao mes?...o salario medio galego supera por primeira vez esta barreira

O salario medio mensual, en termos brutos, subiu un 3,13% en 2022 en Galicia, algo máis que a media, ata 2.056,5 euros, que son uns 72 euros menos que o soldo media do conxunto estatal, segundo os datos que publica este venres o Instituto Nacional de Estatística (INE).

É a primeira vez que o salario medio mensual galego supera os 2.000 euros, cifra que pasou a media estatal xa en 2020. No conxunto estatal, o salario medio mensual, en termos brutos, subiu un 2% en 2022, ata os 2.128,4 euros, a súa cifra máis alta desde que comezou a serie en 2006, segundo o decil de salarios que elabora o INE a partir dos datos da Enquisa de Poboación Activa (EPA).

É o sexto ano consecutivo no que se incrementa o salario medio despois de que en 2016 baixase por primeira vez en dez anos. O aumento de 2022 moderouse respecto ao que se experimentou en 2021, cando subiu un 2,4%.

Segundo os datos de Estatística, o 40% dos asalariados (6,8 millóns de asalariados) gañaron entre 1.440,1 e 2.373,7 euros brutos ao mes en 2022, mentres que o 30% (5,14 millóns de persoas) obtivo remuneracións de polo menos 2.373,7 euros mensuais e o 30% restante (outros 5,14 millóns de asalariados) cobrou un soldo inferior a 1.440 euros ao mes.

Dentro deses 5,14 millóns de asalariados que percibiron as remuneracións máis baixas, máis de 3,4 millóns gañaron menos de 1.252,7 euros brutos mensuais no seu emprego principal, en tanto que 1,7 millóns cobraron menos de 955,55 euros. Así mesmo, 1,7 millóns gañaron máis de 3.629,7 euros brutos ao mes.

MULLERES, NOVAS E TEMPORAIS

Atendendo ao tipo de xornada, o 34,9% dos asalariados a xornada completa gañou polo menos 2.373,7 euros mensuais en 2022 e o 20,2% percibiu menos de 1.440,1 euros. Pola contra, o 87,4% dos asalariados a tempo parcial gañou menos de 1.440,1 euros mensuais e só o 1,6% cobrou 2.373,7 euros ou máis.

Segundo os datos do INE, as mulleres, os mozos, as persoas cun menor nivel de formación, os traballadores con menor antigüidade nas empresas e os contratados temporalmente presentan os salarios máis baixos.