Rueda urxe ao Goberno completar os efectivos que a Policía autonómica "perdeu paulatinamente" en Galicia
O presidente agradece "a entrega, eficacia e esforzo" deste corpo de seguridade para contribuír "a unha Galicia máis segura".
Por Europa Press / Redacción | SANTIAGO | 29/11/2023 | Actualizada ás 17:52
O presidente da Xunta, Alfonso Rueda, reivindicou "a entrega, a eficacia e o esforzo diario" da Policía autonómica para contribuír a "unha Galicia máis segura", en coordinación e colaboración coas restantes forzas e corpos de seguridade. Ao tempo, reiterou a demanda de que urxe completar os efectivos que a Policía autonómica "perdeu paulatinamente" en Galicia. Así o manifestou na entrega de medallas e distintivos da Unidade do Corpo Nacional de Policía adscrita á Comunidade Autónoma (UPA) que neste 2023 cumpre 32 anos.
"En Galicia estamos moi orgulloso de formar parte dunha nación que ten unha das súas expresións de unidade nas nosas forzas armadas e nolos nosos corpos e forzas de seguridade do Estado", trasladou o mandatario galego nesta cerimonia, na que estivo acompañado polo vicepresidente primeiro e conselleiro da Presidencia, Xustiza e Deportes, Diego Calvo.
Na súa intervención, o presidente da Xunta lembrou que Galicia foi pioneira hai 32 anos en contar cunha unidade de policía adscrita, un camiño que despois continuarían outras comunidades. Respecto diso, defendeu a creación deste corpo de seguridade para dar resposta á necesidade de "servir e protexer mellor" aos galegos e galegas "en coordinación" e sen menoscabar as competencias dos restantes corpos e forzas de seguridade do Estado.
ÁREAS DE TRABALLO
Rueda destacou o traballo da Policía autonómica, centrado sobre todo na protección das vítimas de violencia machista e dos menores, na loita contra os incendios forestais, o furtivismo; e a protección do medio ambiente e o patrimonio. O presidente galego fixo mención especial ao labor de prevención que realizan no Camiño de Santiago.
MÁIS EFECTIVOS
Para o mandatario galego, estas accións dan conta do acerto e do "adecuado" deste modelo para levar a cabo estas funcións de servizo á cidadanía galega. "Temos un corpo excelente", enxalzou Rueda, antes de lamentar que, a pesar do seu importante labor na comunidade, o persoal da Policía autonómica reduciuse "paulatinamente" nos últimos anos, ata o punto de que advertiu que esta diminución "comprometería moitísimas actuacións, se non fóra pola profesionalidade do persoal existente".
Por estes motivos, considerou "urxente" que o Goberno central "complemente" na Comunidade galega o número de axentes que lle corresponde. "Cada día que pase seguirémolo reclamando con máis forza", comprometeuse por parte do Xunta de Galicia de face a insistir nesta demanda ao Ministerio de Interior, carteira do Goberno central da que depende esta competencia.
No polo oposto, destacou o apoio da Xunta a este corpo de seguridade. Como exemplo, apuntou á renovación das sedes provinciais e de gran parte do parque móbil e tamén dos equipos informáticos. No acto, impuxéronselles medallas de bronce a 15 policías; entregóuselles os correspondentes diplomas de recoñecemento ao persoal da UPA con máis de 20 anos de servizo a 24 axentes; o distintivo de permanencia ao inspector de Ourense, José Antonio Nogueiras; e entregáronse dez distincións honoríficas a persoal alleo á Unidade de Policía Adscrita.
