O BNG denuncia a existencia dun "acordo secreto" entre a Xunta e Altri: "Xa o tiñan todo atado e ben atado"

O presidente da Xunta, Alfonso Rueda, responderá as preguntas dos líderes da oposición sobre Altri e as "desigualdades" existentes en Galicia no próximo pleno da Cámara galega, no que se debaterá a lei galega de Intelixencia Artificial. Así o avanzaron este martes os grupos tras a reunión da Xunta de portavoces, na que se fixou a orde do día dunha sesión. Na cita política, que terá lugar os próximos días 11 e 12 de febreiro, comparecerá a conselleira de Vivenda e Planificación de Infraestruturas, María Martínez Allegue, para informar as actuacións do Goberno galego en materia de vivenda pública.

O BNG xa denunciou que existe un "acordo secreto" entre a Xunta de Galicia e Altri asinado en setembro de 2021 para a posta en marcha do proxecto de Palas de Rei, mentres que o PSdeG esixiu ao Goberno galego toda a "transparencia e o rigor" neste proxecto. Na rolda de prensa posterior á Xunta de Portavoces da Cámara galega, o deputado do BNG Luís Bará asegurou que a súa formación ten "constancia" de que hai este "acordo secreto" asinado "a través dun documento oculto" que se chama "memorando de entendemento entre Altri e a Sociedade Impulsa", no que a Xunta ten participación maioritaria e na que, segundo sinalou, ten presenza Abanca.

Luís Bará sostivo que "aí se fraguou un acordo político" para implantar Altri en Galicia e que "todo o que veu despois" estaba xa "atado e ben atado". "É dicir, todo o demais está amañado e con todo tipo de irregularidades para un final que vai ser a aprobación do proxecto, a autorización ambiental integrada e a declaración de impacto ambiental favorable", sostivo. O parlamentario nacionalista considerou que este pacto entre a Xunta e Altri ten "dous obxectivos estratéxicos principais": "a implantación do proxecto industrial na Ulloa con todas as bendicións da Xunta e do PP e, a segunda, é garantir o abastecemento de eucalipto en Galicia despois da moratoria establecida en Portugal ata 2030", dixo.

Por iso, conforme sinalou, é "tan importante a ampliación da moratoria en Galicia". "Corremos o risco de sufrir unha devastadora segunda onda eucaliptizadora", manifestou para sinalar que, en todo este proceso, consideran que "tiveron unha participación fundamental as portas xiratorias do PP, representadas na alianza entre Altri e Greenalia por dúas persoas craves como os exconselleiros Beatriz Mato e Antonio Couceiro". "Por tanto, denunciamos o papel de Alfonso Rueda como delegado de Altri no Consello da Xunta e denunciamos o papel da Xunta como xestoría ao servizo das grandes empresas que pretenden expoliar os recursos do noso país", denunciou. Bará, ademais, sinalou que a líder do BNG, Ana Pontón, preguntará sobre este asunto a Rueda no próximo pleno, despois de que "o PP vetase a comparecencia" do presidente da Xunta sobre este asunto.

O PSDEG RECLAMA TRANSPARENCIA

Pola súa banda, a viceportavoz parlamentaria do PSdeG, Elena Espinosa, esixiu "toda a transparencia e rigor" á Xunta de Galicia neste asunto, ao considerar que se trata dun "tema moi serio". Tras lembrar que a súa formación sempre defendeu que este proxecto tiña que ter "viabilidade económica, social e ambiental", sostivo que o que a súa formación "sabe dese informe" é o que "publicaron os medios". "Esperaremos a ter acceso a el para podar valoralo con detalle", trasladou.

"Co proxecto de Altri xa vimos como actuou o PP desde o primeiro momento. Primeiro vendérono como un superproxecto ecolóxico e estratéxico, despois resultou que era unha celulosa. Primeiro prometían miles de postos de traballo, despois xa nin uns centos. E para terminar, seguimos sen saber se a empresa é viable sen diñeiro público", sostivo a socialista. Elena Espinosa subliñou que a súa formación esixe "transparencia e rigor". "Pero queda claro que da primeira nada e do segundo, máis ben pouco", denunciou.

RESPOSTA DO PP

Enfronte e preguntado polas críticas da oposición, o portavoz parlamentario do PPdeG, Alberto Pazos, subliñou que o proxecto de Altri "necesita máis de 30 informes de distintas administracións" e que á Xunta correspóndenlle "27 dos cales 24 xa están elaborados". "O resto de administracións que están a facer ou a que están a esperar?", preguntou Pazos, que dixo que "a Xunta está a facer os seus deberes" e que "Altri será posible ou non, en virtude de cal sexa o resultado colectivo deses informes".

Pazos que insistiu en que a Xunta "está a facer o seu traballo" e que "talvez outras administracións, como o Goberno do Estado" se teñen que pronunciar sobre a súa análise da viabilidade de Altri. "Chámame a atención que se poña o foco sobre a administración que está a cumprir as súas obrigacións e, en cambio, non se diga nada sobre as que o están demorando", apuntou. "Altri instarase se cumpre todos os parámetros que se lle esixen", incidiu nunha intervención na que, ademais, preguntado sobre a crítica do BNG polo "veto" á comparecida de Rueda sobre este tema, Pazos asegurou "non entender" porque cando se toman as decisións que "comparte o Bloque" son decisións que "se votan" e, cando son decisións que non comparte o BNG "son decisións que se vetan".

"É unha maneira moi particular de entender a política", dixo para considerar que "é curioso que se pida a comparecencia do presidente para informar dun informe que non está finalizado". "Non ten ningún sentido", afirmou. "Que se tranquilice o BNG, que o Goberno galego neste ámbito vai actuar con luz, taquígrafos e cumprindo a normativa, como pasa sempre que goberna o PP. Outra cousa é o preocupante que resulta que haxa un partido, o BNG, que crea que pode impor as súas preferencias partidistas ou persoais sobre as consideracións técnicas e o cumprimento da lei que deben avaliar os técnicos", afirmou.

Ademais, tras denunciar o "acordo secreto" o BNG, Pazos sostivo que "debe ser o segredo peor gardado de Galicia" se o sabe o Bloque e engadiu que "pediu unha información e respondéuselle que está suxeita a confidencialidade" como "é normal" en procesos industriais. "A partir de aí, as fabulaciones do señor Bará e o BNG, déixollas ao señor Bará e o BNG", afirmou para cargar contra as "trolas" dos nacionalista contra os proxectos industriais. "Aínda estou a esperar a que o BNG me diga cal é o proxecto industrial que apoia, en calquera sitio de Galicia", afirmou.