O administrador dunha residencia de Verín aproveitouse da demencia dun ancián para que lle vendese pisos e leiras

A Audiencia Provincial de Ourense acollerá este mércores o xuízo contra un socio e administrador dunha residencia de anciáns de Verín, que se enfronta a unha pena de cinco anos e medio de cárcere por estafar a un usuario con demencia para que lle vendese varios inmobles.

Os feitos ocorreron no ano 2012 e xa entón o ancián "padecía unha demencia que lle impedía xestionar a súa persoa e bens", tal e como relata o Ministerio Público. A pesar diso, en marzo dese ano, asinou un contrato de estancia no centro por un importe de 1.188 euros ao mes. Así, en maio de 2013, a pesar de que o home xa tiña "minguada de maneira importante a súa capacidade para a xestión do seu patrimonio", o acusado, que coñecía esta circunstancia, asinou co ancián un contrato polo cal se comprometía a coidalo e prestarlle alimentos na residencia a cambio de que lle vendese dúas leiras. A operación realizouse ese mesmo día.

A continuación, o acusado, "valéndose das limitacións" do usuario da residencia, volveuno a convencer para que outorgase un poder no seu favor e que el mesmo puidese dispor dos seus bens. Desta maneira, fíxose cun piso por 30.000 euros, cunha vivenda pola mesma cantidade, cunha praza de garaxe por 3.000 euros e unha leira rústica por 1.300. Por todo o relatado, a Fiscalía solicita para el unha pena de cinco anos e seis meses de cárcere por un delito continuado de estafa. Tamén deberá reintegrar todos os seus bens aos seus herdeiros ou, se non é posible, devolverlles o seu valor en diñeiro.