Buscan a unha octoxenaria perdida en Vila de Cruces desde a tarde deste luns

Os servizos de emerxencia activaron na tarde deste pasado luns un dispositivo de procura para localizar a unha anciá que se perdeu na localidade pontevedresa de Vila de Cruces despois de saír a dar un paseo.

Segundo informa o 112 Galicia, a Unidade Operativa de Drones da Axega participou neste despregamento de medios durante boa parte desta pasada madrugada. Desafortunadamente, o resultado foi negativo. O dispositivo iniciouse sobre as 18.30 horas, cando a filla da desaparecida comunicou que a súa nai estaba perdida, xa que saíra como de costume a pasear pero tras contactar con ela por teléfono, non sabía regresar a casa.

A partir de aí, a Garda Civil puxo en marcha o operativo, establecendo para os distintos servizos de emerxencia que colaboraron na procura como punto de encontro a estrada de Agolada, en Toiriz, nas inmediacións do tanatorio. Ademais da Benemérita, o GES de Lalín, efectivos da Agrupación de Voluntarios de Protección Civil e os drones da AXEGA tamén formaron parte do operativo, que incluíu familiares e veciños da muller.

Sobre as 04.00 horas da madrugada, as dificultades que presentaba a meteoroloxía para seguir operando cos drones fixo que se interrompese esta intervención remota. Aínda así, os demais servizos continúan na procura da octoxenaria.

Agora cans de rescate da Asociación de Cans de Salvamento de Galicia e un vehículo de montaña de tracción 8x8 da Axencia Galega De Emerxencias (Axega), que pode acceder a recunchos e lugares "moi complexos" onde outros automóbiles de emerxencias da mesma categoría non poden chegar, uníronse ao operativo de procura. Este vehículo conta cun equipo humano multidisciplinar formado polos técnicos da Unidade Operativa de Drones e da Unidade Pegaso da Garda Civil, que traballarán conxuntamente co fin de obter mellores resultados.