O Concello de Pontevedra aproba unha nova oferta pública de emprego
Cun total de 49 prazas, o que supón o 10 % dos traballadores desta administración local.
Por Europa Press / Redacción | PONTEVEDRA | 26/12/2023 | Actualizada ás 17:49
O Concello de Pontevedra aprobou a nova oferta de emprego público 2023 cun total de 49 prazas, o que supón o 10 % dos traballadores desta administración local. O alcalde de Pontevedra, Miguel Anxo Fernández Lores, compareceu este martes para dar conta da Xunta de Goberno Local celebrada á primeira hora da mañá e na que este era o asunto máis importante da orde do día.
Lores enmarcou esta oferta de emprego público "na liña de traballo prioritario de mellorar o funcionamento da administración neste novo mandato", á vez que "se actualiza e moderniza".
Desta oferta de 49 prazas, unhas 19 serán de promoción interna e as outras 30 de convocatoria libre (das que dúas están reservadas para persoas con discapacidade xeral e unha de discapacidade intelectual). Ademais acordouse que as prazas fixas que non se cubran, tanto de discapacidade como de promoción interna, sumaranse á convocatoria libre, sempre que haxa prazas da mesma categoría, "coa finalidade de reducir ao máximo a taxa fixa de temporalidade", explicou o rexedor.
Na escala de administración xeral habilitaranse cinco vacantes de auxiliar, catro de subalterno, tres de técnico medio e dous de administrativo. Mentres que na escala de administración especial, inclúense once vacantes para policías, oito para oficiais, tres para operarios, tres para bombeiros-condutores e unha para aparellador, asistente social, técnico superior en enxeñaría informática, sepulturero, oficial de obras, encargado de instalacións, e enxeñeiro técnico industrial. A Policía Local tratará de cubrir as vacantes nos postos de inspector, inspector principal e intendente principal.
O alcalde sinalou que esta oferta de emprego foi abordada pola mesa de negociación dos empregados públicos municipais na que se fixeron distintas achegas que segundo Lores foron "recollidas na súa totalidade". Aínda que logo os representantes sindicais votaron todos en contra excepto unha abstención.
